‘नेपालं भुटानया न्ह्यःने तकं छ्यं धस्वाके मफइगु जुल’
येँ (नेपालभाषा टाइम्स)÷ नक्कली भुटानी शरणार्थी प्रकरणं यानाः भुटानं नेपाःयात न्हापांनिसें बिया वयाच्वंगु द्वपं प्रमाणित जूगु दु । परराष्ट्रविद् हिरण्यलाल श्रेष्ठं ‘नेपालभाषा टाइम्स’ लिसे खँ ल्हासें थ्व खँ धयादीगु खः ।
वय्कःया कथं भुटानं न्हापांनिसें हे झापाया थीथी शरणार्थी शिविरय् च्वनाच्वंपिं शरणार्थीत सकलें भुटानी मखु, उकी नेपाः लगायत मेमेगु देय्या मनूत नं ल्वाकछ्यानातःगु दु धकाः द्वपं बीगु याना वयाच्वंगु खः। छक्वः नेपाःया प्रधानमन्त्री शेरबहादुर देउवायात समेत भुटानी पक्षं नेपालय् दुपिं सकलें शरणार्थी भुटानी मखु धकाः धया हःगु खः ।
भुटानं बिउगु थ्व द्वपंयात नेपालं खण्डन याना वयाच्वंगु खः । तर आः सार्वजनिक जूगु प्रकरणं यानाः भुटानं नेपाःया बिउगु उगु द्वपं नं प्रमाणित जूगु खँ वय्कलं कनादिल । वय्कलं धयादिल, ‘नेपाःया राज्य सत्ताय् च्वंपिं मनूत हे नेपाःमितय्त भुटानी दयेकाः अमेरिका छ्वयेगु ज्याय् लगे जुयाच्वन धायेबलय् थ्व ला नेपाःया लागिं तःधंगु हे लज्जाया विषय खः ।’ आः ला भुटानया न्ह्यःने तक नं नेपालं छ्यं धस्वाके फइगु अवस्था मंत,’ वय्कलं धयादिल ।
अथे हे नेपाःमियात नक्कली शरणार्थी दयेकेगु ज्याय् तत्कालीन गृहमन्त्री हे लगे जूगु खँ पिहां वःगुलिं नेपाःया गृह प्रशासन नं विश्वसनीय मजू धइगु खँ प्रमाणित जूगु खँ वय्कलं कनादिल ।
वय्कलं कनादी कथं नेपाःया गृह प्रशासनं थःगु देशया सुरक्षा सम्बन्धी गोप्य सूचना तकं विदेशय् छ्वयेगु यानाच्वन धकाः चर्चा जुइगु याः, आः व खँयात नं थ्व प्रकरणं प्रमाणित याना बिउगु दु ।
थुकिं यानाः अन्तर्राष्ट्रिय रुपं हे नेपाःया बेइज्जत जूगु बिचाः नं वय्कलं प्वंकादिल । आः अन्तर्राष्ट्रिय ख्यलय् स्यना वंगु थःगु छबी बचे यायेगु खःसा नेपालं अन्तर्राष्ट्रियस्तरयागु हे समिति दयेकाः थुकिया छानबिन याकेमाःगु खँ वय्कलं कनादिल ।
LEAVE YOUR COMMENTS