युक्रेनया राजधानीइ रुसया तःधंगु हमला

किभ – रुसं युक्रेनया राजधानी किभय् आपालं ब्यालेस्टिक क्षेप्यास्त्र व ड्रोन प्रहार यासें तःधंगु हे आक्रमण याःगु दु । अधिकारीतय्सं कथं आक्रमणय् म्होतिं नं १७ म्ह सीगु दु ।

बुधवाः चान्हसिया इलय् शुरु जूगु रुसी आक्रमणय् मेपिं पीप्यम्ह घाःपाः जूगु दु । रुसं याःगु थ्व आक्रमण थुगु दँय् किभय् याःगु आतकया हे दकलय् घातकमध्ये छगू आक्रमणकथं काःगु दु ।

किभया सैन्य प्रशासनया प्रमुखं टिमोर टकाचेन्कां रुसं सर्वसाधारणयात लक्षित यानाः नागरिक पूर्वाधारय् आक्रमण याःगु धाःगु दु । ‘शत्रुं हाकनं छक्वः किभय् तःधंगु व व्यापक आक्रमण याःगु दु’, सैन्य प्रमुख टकाचेन्कां धाःगु दु ।

घौछि स्वयां अप्वः ई जूगु आक्रमणय् आपालं छेँ, गोदाम व भौतिक संरचना क्षति जूगु दु । किभया मेयर भिताली क्लिच्कों उद्धारया ज्या न्ह्यानाच्वंगु जानकारी बिउगु दु ।

मंगलवाः बहनि लिबाक आक्रमण जूगु खःसा घन्टौंतक साइरनया सः ताये दयाच्वंगु खः । राजधानी सहरया दुने व पिने आपालं लागाय् क्षेप्यास्त्र प्रहार जुयाच्वंगु खः ।

युक्रेनी सेनां नं सर्वसाधारण व आवासीय लागायात लक्षित यानाः रुसी सेनां आक्रमण याःगु द्वपं बिउगु दु । यद्यपि थ्व आक्रमण बारे रुसपाखें छुं नं प्रतिक्रिया धाःसा बिउगु मदुनि ।

युक्रेनी वायुसेनायाकथं रुसं म्होतिं नं २४ गः व्यालेस्टिक क्षेप्यास्त्र व प्यंगः जहाज विरोधी क्षेप्यास्त्र व ११५ गः ड्रोन प्रहार याःगु धाःगु दु । रुसं प्रहार याःगु ड्रोनमध्ये ९४ गः हवाई प्रतिरक्षा प्रणालीपाखें असफल यानागु नं रुसी सेनां दावी याःगु दु ।