भाषा, संस्कृतिया संरक्षण मयाम्ह चुनावय् त्याइमखु

यल- येँ महानगरपालिकाया प्रमुख विद्यासुन्दर शाक्यंस्थानीय भाषा, संस्कृतिया संरक्षण मयाम्ह आः जुइगु स्थानीय निकायया निर्वाचनय् त्याइमखु धयादीगु दु । महानगर प्रमुख शाक्यं गुम्ह मनुखं येँ देय्या भाषा, कला, संस्कृति, सम्पदाया संरक्षण याइम्ह अज्याःम्ह उम्मेदवारं आः जुइगु निर्वाचनय् विजय प्राप्त याये फइमखु धयादीगु खः ।

येँ महानगर प्रमुख शाक्यं उगु खँ नेपालभाषा केन्द्रीय विभागय् जूगु छगू ज्याझ्वलय् धयादीगु खः । विभागय् नेपालभाषा विषयय् स्नातकोत्तर (एमए) तगिमय् अध्यापन शुरु जूगु ४१ दँ क्यं लसताय् जूगु ज्याझ्वलय् नवासें वय्कलं येँ देय् नेपाःया हे छगू प्रमुख सांस्कृतिक नगर जूगु ल्याखं थनया भाषा, कला, संस्कृति, सम्पदाया संरक्षण याये फःसा जक नगरया अस्तित्व नं ल्यनाच्वनीगु जूगुलिं थुखेपाखे राजनीतिक व प्रशासनिक निकायया नं ध्यान वनमाःगु आवश्यक दु धयादिल ।

लिसें वय्कलं थःगु नेतृत्वया जनप्रतिनिधिं येँया भाषा, कला, संस्कृति, सम्पदाया संरक्षण यायेगु ल्याखं आपालं लगानी यानाच्वंगु दु धासें विश्वय् नांजाःगु कुमारि संस्कृतिइ गुगुंकथंया समस्या वयेमा धकाः वर्तमान जीवित देवी कुमारि माजुयात लय् न्यय्द्वः, गणेश व भैरवयात लय् स्वीद्वःया विशेष भत्ताया व्यवस्था यानागु जानकारी बियादिल ।
थुकथं हे पूर्व कुमारिया निंतिं लय् झिंन्याद्वः, पूर्व गणेश व भैरवया निंतिं लय् झिंनिद्वः व कुमारि माजुया सुसाःकुसाः याइम्ह चिताइदारयात नं लय् न्यय्द्वः तका बीगु याना वयाच्वनागु दु धयादिल । उगु इलय् वय्कलं विभागं मुंकातःगु स्वीद्वलं मल्याक सफूयात डिजिटलाइजेसन यानाः ई–लाइब्रेरीइ रुपान्तरण यायेत महानगरं न्यय्गू लख बजेट विनियोजन यानागु जानकारी नं बियादीगु खः ।

उपप्रमुख खड्गी श्रेष्ठं नेवाः समुदायं ल्यंका वयाच्वंगु मूर्त अमूर्त संस्कृतिलिसें भाषा, कला, संस्कारया संरक्षण यायेगु महानगरया न्हापांगु प्राथमिकता जूगु खँ कनादिल ।
उपकुलपति बास्कोटां नेपालभाषा अध्यापनया निंतिं येँ महानगर याःगु ग्वाहालिया कारणं आपालं ज्या याये फुगु खँय् लसता प्वंकादिल । विभागया प्रमुख श्रेष्ठं प्यंगू दशकया अवधि दुने न्यासःत्या विद्यार्थीं नेपालभाषा अध्ययनया निंतिं आवेदन बिउगुलिइ स्वसःम्ह उत्तीर्ण जूगु जानकारी बियादिल ।

उगु विभागया मानविकी व समाजशास्त्र अन्तर्गत नेपालभाषाया एमफिल पीएचडी कक्षा नं शुरु जूगु जानकारी बिउगु खः । वंगु शुक्रवाःनिसें शुरु जूगु उगु कक्षाय् झिंन्याम्ह विद्यार्थी अध्ययन यानाच्वंगु दु ।

ज्याझ्वलय् नेपालभाषाया महाकवि सिद्धिदास महाजुया थीथी च्वसु मुनाः सफू ‘सिद्धिमाः’, किरण केन रंजितया ‘तन्त्राख्यान’ व ‘अमेरिकाय् नेवाः प्रकाशन’, विभागय् अध्ययनरत विद्यार्थी संगठन लुमन्ति दबूया पिथना ‘लुमन्ति दबू’ गुंगूगु ल्याःया पाहांपिं त्रिविया उपकुलपति डा. धर्मनाथ बास्कोटा, येँ महानगर प्रमुख विद्यासुन्दर शाक्य, उपप्रमुख हरिप्रभा खड्गी श्रेष्ठ, पाटन संयुक्त क्याम्पस प्रमुख प्रा. डा. लक्ष्मण कुँवर, केन्द्रीय विभागया प्रमुख प्रा. डा. ओमकारेश्वर श्रेष्ठं मंकाःकथं पितब्वज्या यानादीगु खः ।

सम्बन्धित बुखँ

LEAVE YOUR COMMENTS