येँय् अव्यवस्थित तार चीकेगु ज्या तीव्र

येँ (नेपालभाषा टाइम्स) – स्वनिगःया बजार क्षेत्रय् अव्यवस्थित जुयाच्वंगु टेलिफोन, इन्टरनेट व मतया तार व्यवस्थापन यायेगु ज्या तीव्र जूगु दु ।

सञ्चार तथा सूचना प्रविधि मन्त्री व ऊर्जा, जलस्रोत तथा सिँचाइ मन्त्रीया मंकाः निर्देशनय् नेपाल दूरसञ्चार प्राधिकरणया न्ह्यलुवाय् येँया खुगू मू सतक अव्यवस्थित व छ्यलामच्वंगु तार चीकेगु ज्या न्ह्याकूगु खः । येँया मित्रपुरेश्वर–कालिमाटी, कलंकी सतक खण्डय् इन्टरनेट सेवा प्रदायक वल्र्डलिंक लगायत कम्पनीया प्राविधिक व कर्मचारीतय्सं लाथेपाथे लानाच्वंगु ज्या मवःगु तार व्यवस्थापन यायेगु ज्या न्ह्याकूगु दु ।

थ्व स्वयां न्ह्यः क्वःछिउगु ईया दुने सोचे याःकथं ज्या मजुइवं सञ्चारमन्त्री व ऊर्जामन्त्रीया मंकाः बैठकं तत्काल ज्या क्वचायेकेत कडा निर्देशन बिउगु खः । उगु हे निर्देशन कथं प्राधिकरणं साउन महिना दुने हे क्वःछिनातःगु खुगू रुटया तार व्यवस्थापन यायेगु आज्जु तयातःगु दु । तार व्यवस्थापन जुयाच्वंगु मू क्षेत्र त्रिपुरेश्वर, कालिमाटी, कलंकी, जडीबुटी, पेप्सीकोला, त्रिपुरेश्वर, लाजिम्पाट, समाखुसी टाउन प्लानिङ ग्वंगःबुं, किपू क्षेत्र, पुलांगु बानेश्वर, गौशाल, चाबही खः । न्हूगु निर्णय कथं इन्टरनेट सेवा प्रदायकतय्सं थःपिनिगु कम्पनीया ट्याग दुगु तार तयेमाःगु व्यवस्थायात नं कडा कथं लागू याःगु दु ।