खेल पत्रकारतय् मिखाय् लियोनेल मेस्सी
येँ (रासस) – अन्तर्राष्ट्रिय खेल पत्रकार महासंघ (एआईपीएसं) अर्जेन्टिनाया कप्तान लियोनेल मेस्सीयात फिफा विश्वकप २०२६ या उत्कृष्ट कासामि घोषणा याःगु दु । विश्वन्यंकंया १२१ गू देय्या ४७२ म्ह खेल पत्रकारतय् सहभागिताय् याःगु मतदानया लिधंसाय् मेस्सी उत्कृष्ट कासामि घोषित जूगु एआईपीएस एसियाया दांभरि निरञ्जन राजवंशीं कनादिल ।
मतदानय् मेस्सीं मुक्कं ११७९ ल्याः कयाः फ्रान्सया कप्तान किलियन एम्बाप्पे (७१७ ल्याः) व इंग्ल्याण्डया जुड बेलिंघम (४७०) यात लिउने लाकूगु खः । एआईपीएसं ग्वसाः ग्वःगु मतदानय् एआईपीएस कार्ड दुपिं खेल पत्रकार व एआईपीएस विश्वकप हटलाइन ज्याझ्वलय् ब्वति काःपिं विश्वन्यंकंया पत्रकारत मतदाताया रुपय् दुगु खः । इपिंसं विश्वकपय् उत्कृष्ट स्वम्ह कासामियात प्राथमिकताया लिधंसाय् ल्यःगु खः ।
मतदान प्रणालीकथं न्हापांगु थाय्या कासामिं ५ गू ल्याः, निगूगु थासय् कासामिं ३ गू ल्याः व स्वंगूगु थाय्या कासामिं १ गू ल्याः काःगु खः । जुलाई १३ य् सार्वजनिक याःगु लिपांगु धलखय् २० म्ह कासामि दुथ्याःगु खः । विश्वन्यंकंया खेल पत्रकारतय्गु मतया लिधंसाय् लियोनेल मेस्सीयात फिफा विश्वकप २०२६या एआईपीएस उत्कृष्ट कासामि घोषित याःगु खः ।
लियोनेल मेस्सी
३९ दँया लियोनेल मेस्सी विश्वकपया इतिहासय् खुगू संस्करणया कासा म्हितूम्ह स्वम्ह कासामिमध्ये छम्ह जुयाः २०२६ विश्वकपय् सहभागि जूगु खः । लगातार निक्वःखुसी विश्वकप उपाधि त्याकेगुपाखें छगू विजय तापाःसां मेस्सीं थःगु उमेर यात हे हाथ्या बीकथंया अजू चायापुगु प्रदर्शनपाखें विश्व फुटबलयात हाकनं छक्वः मोहित यायेत सफल जूगु खः ।
विश्वकपया फाइनलय् स्पेनलिसे बुइवं मेस्सी तसकं हे भावुक जूगु खः । अर्जेन्टिनाया समर्थकतय्सं वयागु नां कयाः सः थ्वये काच्वंगु इलय् वयागु मिखां ख्वबि हयाच्वंगु खः । मेस्सी इन्स्टाग्रामपाखें धाःगु खः, ‘ थ्व स्याःचाः (पीडा) तसकं हे तःधं । थ्व घाः लनेत आपालं ई काइ । तर जिमिसं अन्तिम ई तक बियागु संघर्ष, असम्भव थेंज्याःगु कासायात विजयय् हिलाः सिर्जना यानागु ल्वःमंके मफइगु व क्षणयात जिं न्ह्याबलें लुमंकाच्वने गु जुइ ।’
सन् २०२६या विश्वकपय् अर्जेन्टिनाया टोलीया प्रशिक्षक लियोनेल स्कोलानीया टोलीया निंतिं मेस्सी वास्तविक धड्कन जुल । विशेष यानाः निर्णायक क्षणया इलय् मेस्सी टोलीयात नेतृत्व बिल । च्यागू कासाय् च्यागू गोल व प्यंगू एसिस्ट यासे मेस्सीं अर्जे न्टिनयात फाइनलतक थ्यंकेगु निंतिं महत्वपूर्ण भूमिका म्हितूगु खः ।
अर्जेन्टिनां कासाज्वःछि थाकूगु अवस् थापाखें कासायात थःगु पक्षय् लाकेगु व अतिरिक्त इलय् नं संघर्ष यानाः कासा त्याकेगु कलाया प्रदर्शन याःगु खः, गुकिया केन्द्रय् मेस्सी हे दुगु खः ।
ऐतिहासिक कीर्तिमानत
मेस्सीं २०२६ या विश्वकपलिपा थःगु नामय् आपालं कीर्तिमान थप याःगु दु । मिजं व मिसा निगुलिं विश्वकपयात कःघाये बलय् विश्वकप इतिहासया निम्हम्ह दकलय् अप्वः गोल याःम्ह कासामि जूगु दु । विश्वकपय् मेस्सीया मुक्कं गोल ल्याः २१ थ्यंगु दुसा किलियन एम्बाप्पेया २२ गोल दु ।
अथे हे विश्वकप इतिहासय् दकलय् अप्वः एसिस्ट याःम्ह कासामि नं मेस्सी हे खः । वयागु नामय् आपालं कीर्तिमानत दु । मेस्सी विश्वकपय् दकलय् अप्वः ३४ गू कासा म्हितूम्ह, विश्वकपय् दकलय् अप्वः कासा त्याकूम्ह, नकआउट चरणय् दकलय् अप्वः १७ गू कासा म्हितूम्ह, लगातार गुंगू विश्वकप कासाय् गोल यायेगु कीर्तिमान व ल्याय्म्हया अवस्था २० व ३० या दशकय् विश्वकपय् गोल याःम्ह छम्ह जक कासा खः ।
खुक्वःतक विश्वकपया यात्राय् मेस्सीं अर्जेन्टिनायात स्वक्वःतक फाइनलय् थ्यंकूगु दु । अर्जेन्टिनां सन् २०२२ य् विश्वकप त्याकूगु इलय् मेस्सीं उत्कृष्ट कासाया प्रदर्शन याःगु खः । विश्वकपय् छक्वः स्वयां अप्वः गोल्डेन बल त्याकूम्ह मेस्सी छम्ह जक कासामि खः । थुगुसी (सन् २०२७) या विश्वकय् मेस्सीं सिल्भर बल सिरपाः प्राप्त याःगु खः ।
किलियन एम्बाप्पे
२७ दँ दुम्ह फ्रान्सेली कप्तान किलियन एम्बाप्पें फ्रान्सयात लगातार स्वक्वःतक विश्वकपया फाइनलय् थ्यंकेत महत्वपूर्ण भूमिका म्हितल । एम्बाप्पें कासा ज्वःछि १० गू गो ल यानाः स्वंगू विश्वकपय् थःगु मुक्कं गोल ल्याः २२ गू थ्यंकल व विश्वकपया इतिहासय् दकलय् अप्वः गोल याःम्ह कासामिया कीर्तिमान तल ।
सन् २०१८या विश्व च्याम्पियन व २०२२ या उपविजेता फ्रान्स थपालय् धाःसा पदकविहीनया रुपय् कासाया अन्त्य यात । विश्वकपय् इंग्ल्याण्डलिसे रोमाञ्चक स्वंगूगु थासय्या निंतिं जूगु कासाय् फ्रान्स ६-४ गोलं बूगु खः । यद्यपि उगु कासाय् निगू गोल याःम्ह एम्बाप्पें लगातार निक्वःखुसी गोल्डने बुटया अवार्ड त्याकाः विश्वकप इतिहासय् निक्वःतक दकलय् अप्वः गोल याःम्ह न्हापांम्ह कासामिया कीर्तिमान कायमयात । एम्बाप्पें थःत विश्व फुटबलया महान् स्ट्राइकर तमध्ये छम्हया रुपय् स्थापित याःगु दु ।
जुड बेलिंघम
विश्व फुटबलया उत्कृष्ट मिडफिल्डर मध्ये छम्ह माने यानातःगु जुड बेलिंघम २०२६ या विश्वकपय् इंग्ल्याण्डया निंतिं नायक जुल । बेलिंघमं न्हय्गू गोल यासें थःगु टोलीयात स्वंगूगु थाय् बीकल । विश्वकप इतिहासय् सुं नं मिडफिल्डरं याःगु थ्व दकलय् अप्वः गोल खः । २३ दँ दुम्ह बे लिंघमं छगू हे विश्वकपया संस्करणय् दकलय् अप्वः गोल याःम्ह इंग्लिश कासामिया कीर्तिमान नं थःगु नामय् च्वके त ताःलाःगु दु ।
अन्तिम १६ या कासाय् मेक्सिको विरुद्ध व क्वार्टर फाइनलय् नर्वे विरुद्ध निगू निगू गोल यासें बेलिंघमं सन् १९८६ लय् अर्जेन्टिनाया लिजेन्ड डिएगो म्याराडोना लिपा लगातार निगू नकआउट कासाय् निगू गोल याःम्ह न्हापांम्ह कासामिया कीर्तिमान तःगु खः ।
LEAVE YOUR COMMENTS