ने. सं. ११४६ दिल्लागा अष्टमी -

बाघभैरवया चन्दा बाकस चायेकेगु खँय् विवाद

किपू (नेपालभाषा टाइम्स) – किपूया बाघभैरव देगः न्ह्यःने तयातःगु चन्दा बाकस चायेकेगु खँय् विवाद जूगु दु । विवाद ब्वलनेवं बाघभैरव गुथि व्यवस्थापन समितिं किपू नगरपालिकायात समस्या ज्यंकाबीत इनाप यासें पौ च्वःगु दु ।

बाघभैरव जात्राया निंतिं दँय्दसं साउन १० गते चन्दा बाकस चायेकेगु याना वयाच्वंगु खः । वंगु २०८२ साल साउन १० गते नं चन्दा बाकस चायेकेगुज्या जूगु खः । उगु इलय् चन्दा बाकसय् १,०६,८५०/– तका ध्यबा दुगु व उगु ध्यबा किपुली च्वंगु कृषि विकास बैंकय् जम्मा याःगु खः ।
उकथं हे पतिइ चन्दा बाकस चायेकेत माःगु सल्लाह यायेत वंगु साउन १ गते वडा अध्यक्ष इच्छाकुमार महर्जनयात नापलानाः पौ बुझे यायेगु कुतः यानागु खःसां नं पौ बुझे मयासें चन्दा बाकस चायेकेमखु धासें खँ ल्हायेत तकं कुतः मयाःगु व समितिया पदाधिकारीतय्त नं लाथेपाथे धयाः लित छ्वयाहःगु खँ उगु पतिइ न्ह्यथना तःगु दु ।

पतिइ वइगु भदौ १ गते जुइगु जात्रा न्ह्याकेगु निंतिं किपु नपाया मेयरपाखें वडा अध्यक्ष व गुथि व्यवस्थापन समितिया पदाधिकारी दथुइ समन्वय यानाबीत नं इनाप यानातःगु दु ।

थ्व विषयय् खँ ल्हायेत वडा अध्यक्ष महर्जनयात ‘नेपालभाषा टाइम्स’ फोन यानागु खःसा वय्कलं थ्व विषयय् खँ ल्हायेत उलि चिउताः प्वंकामदी । नेपालभाषा टाइम्स लिसे खँ ल्हायेगु झ्वलय् वय्कलं धयादिल, ‘समितिया पदाधिकारी धाःपिं वैधानिक मखु । छिकपिनि नं छुं खँ न्यनेमाःसा वडा ज्याकुथिइ हे झासँ  ?’

मेखे प्रमुख प्रशासकीय अधिकृत भट्टं वडा अध्यक्ष लिसे समन्वय यायेगु ज्या थःगु मखुगुलिं मेयर कृष्णमान डंगोलयात जानकारी याके धुनागु खँ कनादीगु दुसा मेयर डंगोलं नं स्थानीय च्वनाः याःसा गाःगु ज्याय् अनावश्यक रुपं विवाद हयेगु ज्या जुयाच्वंगु खँ धयादीगु दु ।

वय्कलं धयादिल, ‘न्हापा गुबलें विवाद मदु, आः नं विवाद पिकायेमाःगु आवश्यक मदु । स्थानीय जानाः जक याःसां गाःगु ज्या खः । नगरपालिकाय् वयेमाःगु ज्या मखु ।’