फिफां कतार विश्वकपय् ४८ टिम म्हितकेगु बिचाः हिल

विश्व फुटबल महासघं फिफां सन् २०२२ य् कतारय् जुइगु विश्वकपय् ४८ गू टिमयात म्हितकेगु योजनाय् हिउपाः हःगु दु । थ्वयां न्ह्यव फिफां सन् २०२६ विश्वकपय् जक सहभागी टिमयात ३२ टिमं अप्वयेकाः ४८ टिम दयेकेगु योजना दयेकातःगु खः । तर वंगु दँय् फिफाया अध्यक्ष जियानी इन्फान्टिनों सन् २०२२ या विश्वकप निसें हे थ्व योजना लागु यायेगु धयादीगु खः ।

तर आः हाकनं कतार छगुलिं जक उलिमछि टिमया व्यवस्थापन यायेमफइगु जुइवं फिफां थःगु योजना हिउगु खः ।फिफां तःगू अध्ययन व परामर्श लिपा वइगु विश्वकपय् टिम संख्या थपे मयायेगु जानकारी बिउगु खः । फिफां अध्ययनया झ्वलय् कतार याकःचा जक ४८ टिम सहभागी जुइगु विश्वकप आयोजन यायेत थाकुइगु निष्कर्स पिकाःगु खः ।

यदि टिम अप्वेकेगु खःसा कतारं मेगु राष्ट्र नाप सह–आयोजना यायेमालि । सहआयोजक सहित यायेगु सम्भावना दुसां इलं मलाये धुंकूगु खँ नं फिफां धाःगु दु । युइएफएया अध्यक्ष एलेक्सन्डर सिफेरिनं कतार विश्वकपय् १६ टिम थप यायेबलय् तःगू हे समस्या वइगु खँ धाःगु दु ।
फिफां जानकारी बिउकथं आः सन् २०२६य् जुइगु विश्वकपय् जक ४८ गू दय् सहभागी जुइ । सन् २०२६ या विश्वकप अमेरिका, क्यानेडा व मेक्सिको जानाः याइगु जुइ ।