काठमाडौं मेडिकल कलेजय् मानसिक स्वास्थ्य बारे प्रशिक्षण

ख्वप (नेपालभाषा टाइम्स) – काठमाडौं मेडिकल कलेज दुवाकोटय् ख्वप जिल्लायात थःगु कर्मथलो दयेकाः पत्रकारिता यानाच्वंपिं पत्रकारतय् निंतिं मानसिक स्वास्थ्य व तनावया नापं उकिया रिपोर्टिङ यायेबलय् नालेमाःगु थीथी कथंया प्रावधानया विषयय् विज्ञतय्पाखें परामर्श व प्रशिक्षण ज्याझ्वः जुल । प्रशिक्षणय् पत्रकारतय्सं जिम्मेवार धंगं आत्महत्या, हत्या व थीथीकथंया संवेदनशील घटनाया रिपोर्टिङ यानाः समाचार दयेकेगु इलय् नालेमाःगु आचारसंहिताया विषयय् ध्वाथुइकूगु खः ।

तनाव ब्यवस्थापनया विषयय् नीन्यादँ थ्व ख्यलय् ज्या यानादीधुंकूम्ह मानसिक ल्वय् विशेषज्ञ डा. सरोज धितालं नेपालय् न्हिं नीम्ह मनुखं मानसिक ल्वय्या कारणं आत्महत्या यायेगु यानाच्वंगु कनादिसें उकियात म्हो याये फइगु बारे नं कनादीगु खः ।

स्वंगू करोडया हाराहारीइ जनसंख्या दुगु नेपालय् १० प्रतिशत अर्थात ३० गू लख मानसिक ल्वय् दुपिं दुगु न्ह्यथनादिसें १ प्रतिशत जक थुकी गम्भिर प्रकृतियापिं दइगु खँ कनादिल ।

ज्याझ्वलय् मानसिक ल्वय्विज्ञ डा. सुजिता खड्कां ख्वइगु, नुगः खाना वइगु, तं पिहां वइगु, सी मास्ति वःगु खँ ल्हाइगु धइगु मानसिक ल्वय्या संकेत जुइफुगु खँ न्ह्यथनादिसें इलय् हे वयात छेँजः वा थःथितिपिंसंं इलय् हे उपचारय् निंतिं हल धाःसा परामर्शं नं ठीक जुइगु व उकिं नं ठीक मजुइगु व गम्भीर अवस्थाय् थ्यनेधुंकूगु खःसा वासः नकाः ताःई तक उपचार यायेमाली धयादिल ।

मानसिक ल्वय्या उपचार सम्भव जूगु न्ह्यथनादिसें डा. शुभेच्छा गौतमं ल्वय्यात नाटक याःगु तायेकाच्वन धाःसा लिपा लायेफुगु खँय् सचेत यासें छेँजःपिं ग्वाहालि यायेगु वातावरण दयेकाः लक्षण खने दयेवं हे सतर्क जुयाः परामर्श वा उपचारय् यंकेगु स्वयेमाः धयादिल ।

ज्याझ्वः नेपाल पत्रकार महासंघ जिल्ला शाखा ख्वपया समन्वयय् जूगु खः ।