ने. सं. ११४४ कौलाथ्व तृतीया -

फुटबलय् भिएआर प्रविधि छ्यलेत फिफा तयार

विश्वकप फुटबलय् नं आः भीएआर धाइगु भिडियो असिस्टेन्ट रेफ्री प्रविधि छ्यलेत लँ चाःगु दु । विश्व फुटबल महासंघ (फिफां) फुटबल धेंधेंबल्लाखय् भिएआर प्रविधि छ्यलेफुगु नीति सर्वसम्मतं पारित यायेवं विश्वकपय् नं थ्व प्रविधि छ्यलेत लँ चाःगु खः । तर वइगु जुन जुलाइलय् रुसय् जुइगु विश्वकपय् थ्व प्रविधि छ्यलेगु कि मछ्यलेगु धयागु निर्णय धाःसा मार्च १६ य् जुइगु फिफां बैठकं जक निर्णय याइ ।
स्वीट्जरल्यान्डया ज्युरिखय् जूगु फिफांया बैठकं फुटबलय् भिएआर प्रविधि छ्यलेगु बारे ऐतिहासिक निर्णय याःगु खः । उगु बैठकय् अन्तर्राट्रिय फुटबल एशोसियसन बोर्डया दुजःतय् दथुइ भीएआर प्रविधिया प्रभावकारिता बारे विश्लेषण न्ह्यब्वःगु खः ।

कासाया झ्वलय् वइगु विवाद ज्यंकेत थ्व प्रविधिं ग्वाहालि याइ । गथेकि विवादास्पद गोल, पेनाल्टिया लिसें छुं नं कथंया विवाद जुल धाःसा कासा जुयाच्वंगु हे इलय् भिडियो स्वयाः निर्णय यायेफइ । छुं छुं इंग्लिस फुटबलय् थ्व प्रविधिया परीक्षण जुइधुंकूगु दुसा इटली व जर्मनीइ थुकिया छ्यलाबुला नं जुया वयाच्वंगु दु ।फिफाया अध्यक्ष जानी इन्फन्टिनों भीएआर प्रविधि आःया इलय् फुटबलया छगू महत्वपूर्ण ब्व जुइधुंकूगु धाःसा थ्व प्रविधिइ थः सकारात्मक दुगु खँ धयादीगु दु । थ्व प्रविधिया सिद्धान्त फयांफतले म्हो हस्तक्षेप यायेगु व कासाया इलय् त्रुटिपूर्ण निर्णय मजुइमा व निष्पक्ष कासा जुइमाः धयागु खः धकाः फिफां धाःगु दु । तर आलोचकतय्सं धाःसा थ्व प्रविधि छ्यलेबलय् कासा तसकं सुस्त जुइगु व अन्यौल ब्वलंकीगु खँ धयाच्वंगु दु । कासा दिकाः भिडियो स्वया च्वनेबलय् कासाया स्पिरिटि हे मदइगु आलोचकतय् धापू दु ।