एसिया कपय् नेपाःया मिसा टिमयात छनोट यायेगु मू आज्जु – प्रशिक्षक फिलिप्स

येँ – नेपाःया राष्ट्रिय महिला फुटबल टिमया मुख्य प्रशिक्षक ग्यारी फिलिप्सं बिहिवाः सातदोबाटोय् च्वंगु एन्फा कम्ल्पेक्सय् सञ्चारकर्मीतलिसें खँ ल्हायेगु झ्वलय् थःपिनिगु मू आज्जू एएफसी महिला एसियन कप २०२२ य् छनोट जुइगु धाःगु दु । टिमं न्हियान्हिथं प्रगति यानाच्वंगु नं प्रशिक्षक फिलिप्सं कंगु दु । प्रशिक्षक फिलिप्सं टिमय् दुथ्याःपिं २३ म्ह कासामिया नां पित बिइधुंकूगु दु ।

नेपाःया टिमं उज्वेकिस्तानय् जुइगु छनोट कासाय् फिलिपिन्सलिसे असोज २ गते व हङकङलिसे असोज ५ गते म्हितीगु ज्याझ्वः दु । पुचःया शीर्ष टिमं मेगु दँय् भारतय् जुइगु एसिया कपय् म्हिती । उज्वेकिस्तानया मौसम नेपाःया टिमया निंतिं हाथ्या जुइफूगुलिं प्रशिक्षक फिलिप्सं नेपाःया कासा न्हिनय् मयासे सनिलय् यायेत अपिल नं याःगु दु । उज्वेकिस्तान वने न्ह्यः नेपालं बंगलादेशलिसें भाद्र २४ व २७ गते दशरथ रंगशालाय् निगू मैत्रीपूर्ण कासा म्हितीगु एन्फां जानकारी बिउगु दु ।