बोल्ट फुटबलया ट्य्रालय्

महान धावक युसेन बोल्ट ट्य्राक एण्ड फिल्डय् सन्यास कायेधुंकाः आः फुटबलय् क्यारियर दयेकेत वंगु दु । च्यागू तक ओलम्पिक स्वर्ण पदक त्याकेधुंकूम्ह जमैकाया बोल्टं फुटबल म्हितेगु निंतिं अस्ट्रेलियाया सेन्ट्रल कास्ट मरिनर्सय् ट्य्राल बिउवंगु दु ।

मरिनर्सया प्रमुख शन मीलक्याम्पं बोल्टयात क्लबय् हयेगु निंतिं प्यला न्ह्यवनिसें कुतः यानाच्वनागु खँ धासें बोल्ट लिसे छगू सिजनया निंतिं सम्झौता जुइत्यंगु खँ धाःगु दु । बोल्ट जर्मन, नर्वे व दक्षिण अफ्रिका वनाः क्लब फुटबलय् ट्य्राल बिउवनेधुंकूगु दु ।

१०० मि. व २०० मिटर ब्वाज्याया कीर्तिमानि धावक बोल्टयात थुगु शताब्दीया हे उत्कृष्ट धावक कथं माने यानातःगु दु । ३१ दँया बोल्टं थगुने जूगु विश्व च्याम्पियन्सया इलय् ह्यामस्ट्रिङ्ग जूगुलिं संन्यास काःगु खः । बोल्ट इंग्लिस प्रिमियर क्लब म्यानचेस्टर युनाइटेडया फ्यान खः ।