डिसेम्बरय् बंगलादेश लिहां वयेगु हसिनाया घोषणा
दिल्ली – बंगलादेशया अपदस्थ पुलांम्ह प्रधानमन्त्री शेख हसिनां वइगु डिसेम्बरय् बंगलादेश लिहां वयेगु घोषणा याःगु दु । शेख हसिनायात बंगलोदशय् मानवताविरुद्ध अपराध द्वपनय् वयागु अनुपस्थितिइ हे मृत्युदण्ड सजाय न्यंकातःगु दु ।
शेख हसिनाया थ्व घोषणा लिपा बंगलादेश सरकारं भारतय् वय्कःयागु सार्वजनिक राजनीतिक गतिविधियात कयाः तच्वकं आपत्ति प्वंकूगु दु । पदच्युतलिपा शेख हसिना भारतय् निर्वासित जीवना हनाच्वंगु दु ।
सन् २०२४ य् जूगु विद्यार्थी नेतृत्व आन्दोलनं हसिनाया सरकारयात सत्तां चिइकूगु खः । निदँ लिपा न्हू दिल्लीइ जूगु छगू ज्याझ्वलय् अडियो सन्देशपाखें सम्बोधनयासे हसिनां थःविरुद्ध फैसला जूसां जनताप्रतिया जिम्मेवारी पूवंकेत स्वदेश लिहां वयेमाःगु धाःगु दु । हसिनां धाःगु दु, ‘जितः जेलय् तयेफु, स्याये नं फुल वा मेगु न्ह्यागु नं जुइफु, तर जि लिहां वने हे माः । ग्यानां जनताप्रतिया जिगु कर्तव्य निर्धारण जुइफइ मखु ।’
अथेहे शेख हसिनां थःगु पार्टी अवामी लिगयात तयातःगु प्रतिबन्ध चिइकेत व राजनीतिक बन्दीतय्त त्वःतेत नं इनाप याःगु दु । बंगलादेशया पुंलाम्ह प्रधानमन्त्री शेख हसिनां थःत बियातःगु सकतां द्वपंत अस्वीकार यानावयाच्वंगु दु ।
हसिनाया सम्बोधनलिपा बंगलादेशया विदेश मन्त्रालयं कडा प्रतिक्रिया बिउगु दु । भारतीय भूमिपाखें हसिना व वया ग्वाहालिमितय्सं बंगलादेश व अनया जनताविरुद्ध ‘विषाक्त अभिव्यक्ति’ बिउगु द्वपं बियातःगु दु । मन्त्रालयं जारी याःगु विज्ञप्तिइ जुलाइ क्रान्तिया निक्वःगु वार्षिकोत्सवया हे दिं थज्याःगु ज्याझ्वः जूगुयात बंगलादेशया सार्वभौमसत्तायात कयाः जूगु अपमान व आन्दोलनय् शहीद जू पिंप्रति अनादरया रुपय् व्याख्या याःगु दु । लिसें थुकिं निगू देय् दथुया स्वापुतिइ नं नकरात्मक लिच्व लाये फइगु ख्याच्वः बियातःगु दु ।
बंगलादेशया विदेश मन्त्रालयं जारी याःगु विज्ञप्तिइ फरार दोषी नरसंहारकर्ता शखे हसिनायात मिडियालिसे प्रत्यक्ष खँ ल्हायेत अनुमति बिउगु धासे आक्रोश प्वंकुसे निगू देय् दथुइ द्विपक्षीय स्वापुतिइ लायेफुगु प्रभावयात भारत सरकारं बिचाः मयाःगु नं धयातःगु दु ।
LEAVE YOUR COMMENTS