मनाङं थ्रीस्टारयात बुकल

येँ – शहीद स्मारक लिग अन्तर्गत थौं जूगु परम्परागत प्रतिद्वन्द्वी थ्रीस्टार व मनाङ मस्र्याङ्दी दथुया भिडन्त मनाङं त्याकूगु दु । तनावपूर्ण कासाया दथुइ मनाङं थ्रीस्टारयात छगूया विरुद्ध निगू गोलं बुकूगु खः । कासाया १० औं मिनेटय् हे अञ्जन विस्टया गोलया ग्वाहालिं मनाङं अग्रता काःगु खः ।

मनाङया निंतिं मेगु छगू गोल धाःसा थ्रीस्टारया आत्मघाती गोलपाखें चूलात । कासाया १८ औं मिनेटय् एलन न्यौपाने क्लियर याःगु बल विजय धिमालयात लानाः पोस्टय् दुहां वंगु खः । न्हापांगु हाफय् निगू गोलं अग्रता काःगु मनाङविरुद्ध थ्रीस्टारं कासाया ८५ औं मिनेटय् जक गोल यायेफुगु खः ।

डिबक्स दुने थ्रीस्टारया अजायी मार्टिन्सयात फल तयेवं वःगु पेनाल्टियात रञ्जित धिमालं गोल याःगु खः । थ्व विजय लिपा मनाङ थःम्हं म्हितूगु स्वंगुलिं कासा त्याकाः ९ अंक सहित ल्याः धलखय् शीर्ष थासय् थ्यंगु दु । मेखे म्हिगः हे जूगु न्हापांगु कासाय् च्यासल युथ क्लबं एनआरटीयात बुकूगु दु । च्यासल एनआरटीयात ५—१ गोलया तःधंगु अन्तरं बुकूगु खः ।

यलया एन्फा कम्प्लेक्सया मैदानय् जूगु कासाय् बिमल घर्तीमगर व अमिर श्रेष्ठं निगू निगू व सन्तोष साहुखलः नं छगू गोल याःगु खः । एनआरटीया लागि छगू जक गोल मोसोद अग्बोलां याःगु खः ।च्यासल युथ क्लबया निंतिं न्हापांगु हाफय् अमिर श्रेष्ठं निगू गोल यासें अग्रता बिउगु खः । अमिरं कासाया १४ व २९ मिनेटय् गोल याःगु खः ।

निगूगु हाफय् च्यासल युथं स्वंगू गोल यात । बिमल घर्तीमगरं कासाया ५७ व ८६ औं मिनेट गोल याःगु खःसा ६३ औं मिनेटय् बिमलया पासय् सन्तोषं गोल याःगु खः । कासाया इन्जुरी इलय् एनआरटीं छगू जक गोल याःगु खः । च्यासलया लिगय् थ्व न्हापांगु विजय खःसा एनआरटी छगू नं कासा त्याःगु मदुनि ।