राष्ट्रियसभाय् नं प्रमया राजीनाम फ्वन

येँ (नेपालभाषा टाइम्स) – सुनसरीया देवानगञ्जया हिंसात्मक घटनायात कयाः राष्ट्रियसभाय् नं प्रधानमन्त्री व गृहमन्त्रीया राजीनामा फ्वंगु दु । नेपाली कांग्रेसया सांसद रञ्जित कर्णं सुनसरीया देवानगञ्जयात कयाः सरकारया कडा आलोचना यासें राजीनामा फ्वंगु खः । सरकारया गैरजिम्मेवारीया कारणं तःधंगु दुर्घटनापाखे देय् न्ह्याःवंगु धासें प्रधानमन्त्री व गृहमन्त्रीया राजीनामा फ्वंगु खः ।

कर्ण देवानगञ्जया घटना बारे सरकारयात लछि न्ह्यवंनिसें जानकारी दयेक दयेकं नं गृह मन्त्रालय व जिल्ला प्रशासनं चिउताः मक्यंगु द्वपं बियादीगु दु । उकथं हे सांसद कर्ण आःया सरकारं वंगु इलय् स्थापित याःगु नजिर लुमंकूसें प्रधानमन्त्री व गृहमन्त्रीया राजीनामा फ्वनादीगु खः । कर्ण संसदय् न्ववायेगु झ्वलय् धयादिल, ‘राज्यया गोलीं नागरिक सित धाःसा प्रधानमन्त्री व गृहमन्त्रीं जिम्मेवारी कायेमाः धइगु नजिर छिकपिसं हे स्थापित यानादीगु खः । वहे नजिरया आधारय् आः प्रधानमन्त्री व गृहमन्त्रीं राजीनामा बियाः लँपु चायेकाबीमाः ।’