ख्वपया सायाःया तथ्यांक संकलन अभियान
ख्वप (नेपालभाषा टाइम्स) – दँय्दसं गुंलागा पारुकुन्हु स्वनिगःलिसें नेवाःतय् ख्वातुगु बस्ती दुगु थासय् सापारु अर्थात सायाः पिथनेगु चलन दु । थ्वकुन्हु दछिया दुने थः मदुपिं छेँजःया लुमन्तिइ मोक्षया कामना यासें सायाः पिथनेगु याइ ।
विशेषतः स्वनिगः दुने ख्वपया सापारु अर्थात सायाः पिथनीगुयात बिस्कं महत्व बियातःगु दु । थनया सापारु वा सायाः पिथनेगुयात ऐतिहासिक व सांस्कृतिक रुपं तसकं महत्व बियातःगु दु । थन सापारुकुन्हु ७०० निसें ८०० तक छेँजःपिंसं थः मदुपिं छेँजःया लुमन्तिइ थीथी गतिविधि यायेगु याना वयाच्वंगु अनुमान दु ।
तर थुकिया आधिकारिक तथ्यांक तयेगु ज्या धाःसा आतक जूगु मदुनि । आःतक गुगुं निकायं सीपिनि छेँजः, सांस्कृतिक पुचः व सापारुया इलय् जुइगु छुं नं गतिविधिया तथ्यांक संकलन याःगु अवस्था मदुनि ।
आः वयाः थनया सायाःया गतिविधिया बारे तथ्यांक संकलन यायेगु अभियान शुरु याःगु दु । विशेष यानाः थनया सापारु पर्व स्वयेत स्वनिगःलिसें देय्या थीथी थासं व विदेशी पर्यटकत नं वयेगु याः । छगू अनुमानकथं थनया सायाः स्वयेगु निंतिं करिब स्वंगू लखतक स्वकुमिपिं वयेगु याना वयाच्वंगु दु । न्यागू किलोमिटर स्वयां ताःहाकःगु सायाःया लँपुइ जुइगु परिक्रमाय् विशेष यानाः न्हिनसिया ११ ताः ई लिपा व ३ ताः ई न्ह्यः तक स्वकुमिपिनिगु तसकं हुलमुल जुइ । गुकिं यानाः सायाःयात व्यवस्थापन यायेत हे तसकं हाथ्यां जाइगु याइ ।
जात्रा स्वयेत वइपिनिगु हुल व्यवस्थापनलिसें दान यायेत वइपिंत नं उतिकं थाकुयाच्वंगु अवस्था खः । दँय्दसं सायाःकुन्हु व्यक्तिगत, संस्थागत, कर्पोरेट ख्यःपाखें सायाः वइपिंत नसाज्वलं, त्वँसा ज्वलं, थीथी देछा, थःथःपिनिगु उतपादन वितरण यायेगु याइ । थथे स्वइच्छां दान यायेगु याःसां सु परिवार गनं जात्रा सहभागि जुइ धइगु स्पष्ट विवरण मदुगुलिं प्रभावकारी रुपं ग्वाहालि यायेत थाकुयाच्वंगु अवस्था खः ।
सायाः वइपिं व दान याइपिं जक मखु न्हापांखुुसी जात्रा स्वयेत वइपिं व ख्वप पिनं वइपिं आपालं स्वकुमिपिं नं अन्योलय् लानाच्वंगु दु ।
संचारमाध्यम, सामाजिक संजाल, थीथी माध्यमं वइगु भिडियो, इन्टरनेट, अनलाइन पोर्टल आदिइ थनया सापारुया न्ह्यइपुगु व आकर्षक लु स्वयाः वइपिं पर्यटक स्वकुमिपिंत छु गुगु सांस्कृतिक गतिविधि गन, गुगु इलय् जुइगु वा जुयाच्वंगु दु धइगु जानकारी सहज रुपं उपलब्ध मजूगुलिं समस्या जुइगु यानाच्वंगु दु ।
थ्व हे समस्या ज्यंकेया निंतिं आः थुकिया लगत वा विवरण संकलन अभियान शुरु याःगु दु । आन्तरिक व बाह्यलिसें विदेशी पर्यटकयात समस्या मजुइमा धकाः गुगल फारामपाखें सीपिनि छेँजः व सांस्कृतिक पुचःतय् विवरण संकलन यायेगु अभियान न्ह्याकूगु दु । दिवंगत जूपिनि सकलें छेँजः, गुथि, सांस्कृतिक गतिविधि याइगु पुचःयात थःपिनिगु विवरण अनलाइन फारामपाखें जायेकेत इनाप याःगु दु । अनलाइन फारामय् सहभागि परिवारं नगर परिक्रमा गुगु त्वालं शुरु यायेगु, छु गुगु सांस्कृतिक पुचः सहभागि जुइगु, दिवंगत जूम्हेसिया बःचाः हाकःगु म्हसीका, स्वापूलिसें मेमेगु आवश्यक जानकारीया विवरण न्ह्यथनेमाः ।
थुकथं संकलन याःगु तथ्यांकं सायाः स्वयेत वइपिंत थःत यःगु ज्याझ्वः वा गतिविधि स्वयेत, दान यायेत वइपिंत उचित परिवार व पुचःयात दान यायेत ग्वाहालि जुइगु नापं सम्बन्धित निकाययात हुल व्यवस्थापन, सुरक्षा, सूचना प्रवाह व सांस्कृतिक सम्पदाया अभिलेखीकरण थेंज्याःगु ज्याय् नं महत्वपूर्ण ग्वाहालि जुइगु विश्वास याःगु दु ।
भक्तपुर टुर्स रिसर्च सेन्टरं कर्पोरेट ख्यःपाखें उपलब्ध जुइगु उत्पादनया नमूना, देछा, द्वहलपा, नसात्वँसा ज्वलंलिसें मेमेगु ज्वलं दिवंगत जूपिनि सम्बन्धित छेँजः व जात्राय् सहभागि समुदायतक व्यवस्थित रुपं वितरण यायेत थुगु तथ्यांक तसकं उपयोगी जुइगु विश्वास काःगु दु ।
थुगुसीया सायाःया दिंनिसें हे थुकथं सहज रुपं सायाः स्वयेगु, ब्वति कायेगु व दान यायेगु ज्याय् सहजता हयेगु ल्याखं सायाः पिथनीपिं दिवंगत छेँजःलिसें सांस्कृतिक पुचःयात नं इलय् हे फाराम जायेकाः दर्ता यानाः सायाःयात अझ व्यवस्थित, सुरक्षित, जानकारीमूलक व सकसिगुं निंतिं सहज यायेगु ज्याय् ग्वाहालि यायेत नं इनाप याःगु दु ।
LEAVE YOUR COMMENTS