ओमानय् निर्यात व्यापार सम्बन्धी अन्तक्र्रिया
ओमानं राजेश महर्जनपाखें
ओमान (नेपालभाषा टाइम्स)- ओमानया मस्कटय् च्वंगु नेपाःया दूतावासया ग्वसालय् ‘व्यापारिक अन्तरक्रिया व सम्बन्ध निर्माण’ विषयय् अन्तक्र्रिया ज्याझ्वः जूगु दु । निर्यात–लगानी अप्वयेकेगु ताः तयाः जूगु ज्याझ्वलय् नेपाःपाखें निर्यात जुइगु उत्पादन, नेपालय् लगानीया अवसर, नेपाली व ओमानी व्यापारीतय् दथुइ व्यापारिक स्वापू विस्तार यायेगु बारे जानकारी कालबिल जूगु खः । ज्याझ्वलय् उच्चस्तरीय नेपाली व्यापारिक पुचः, ओमानया व्यवसाय व हाइपरमार्केटया सीईओ, निर्देशक व प्रतिनिधि, संचारकःमि, ओमानया नेपाली व्यापारीलिसें ७० म्हसिबें अप्वः मनूतय्सं ब्वति काःगु खः ।
ओमानया निंतिं नेपाःया कार्यवाहक राजदूत विशेषकुमार साहं ज्याझ्वलय् न्ववानादिसें नेपालं व्यापार व लगानीया अवसरयात प्रवद्र्धन यायेगु निंतिं ओमानयात महत्वपूर्ण साझेदारया रुपय् प्राथमिकताय् तःगु खँ धयादिल । वय्कलं नेपाःया उच्चस्तरीय व्यापारिक पुचःया थ्व न्हापांगु भ्रमण जूगुलिं लसता प्वंकादिसें सहभागी सकलसित सुभाय् नं देछानादिल ।
नेपालय् उपलब्ध लगानीया अवसर, लगानी प्रक्रिया, संस्थागत व्यवस्था व नेपाः ओमानी लगानीकर्तातय् निंतिं छाय् आकर्षक गन्तव्य खः धयागु विषयया प्रस्तुति लिपा वय्कलं सगरमाथा आरोहण याःम्ह न्हापांम्ह ओमानी मिसा नादिरा अल हर्थी लिसें च्वापु चलखय् लानाः मदुपिं मेमेपिं आरोहीपिंत दुनुगलंनिसें श्रद्धाञ्जलि देछायादीगु खः ।
निर्यात व्यवसायी महासंघ नेपाःया नायः भाजु गोविन्द घिमिरें नेपाःपाखें निर्यात यायेफइगु प्रतिस्पर्धात्मक लाभ दइगु थीथी उत्पादनया सम्भावनायात कयाः प्रस्तुति बियादिसें निर्यातमुखी अर्थतन्त्रयात प्रवद्र्धन यायेत महासंघं यानाच्वंगु कुतःबारे जानकारी बियादिल । ज्याझ्वलय् नेपाल हस्तकला महासंघया नायः रविन्द्र शाक्यं ओमान व खाडी मुलुकय् व्यापारिक सम्भावना दुगु नेपाली हस्तकलाया मौलिकता, परम्परागत सीप व हस्तकला सामग्रीयात कयाः प्रस्तुति बियादीगु खः ।
ज्याझ्वलय् थीथी नेपाली हलंज्वलंया ब्वज्या नं जूगु खः । ज्याझ्वलय् सहभागीपिंसं नेपाःया उत्पादनप्रति रुचि प्वंकूसें व्यापारिक सम्भावनायात कयाः सहलह ब्याकूगु खः । नेपाःया व्यापारिक पुचलं ब्वति काःपिं व्यापारीतलिसे भविष्यय् जुइगु सहकार्य व व्यावसायिक साझेदारीया सम्भावनायात कयाः अन्तक्र्रिया याःगु खः । ज्याझ्वलय् नेवाः नसाज्वलं, विशेष यानाः मम सहितया डिनरया ग्वसाः ग्वःगु खः । ज्याझ्वः स्वम्हम्ह कजि मय्जु उषा अधिकारीं न्ह्याकादीगु खः ।
उच्चस्तरीय व्यापारिक पुचः वंगु अगष्ट ३ य् मस्कट थ्यंगु खःसा नेपाली दूतावास मस्कटं छगू प्रेस विज्ञप्ति पिथनाः लुलु हाइपरमार्केटलिसे प्रतिनिधिमण्डलया निंतिं बी २ बी अन्तरक्रिया ज्याझ्वः ग्वसाः ग्वःगु व मेमेगु कम्पनीलिसे नं थज्याःगु ज्याझ्वः यायेगु खँ धाःगु दु । नेपाली प्रतिनिधिमण्डल ओमान उद्योग वाणिज्य संघ व ओमान लगानी प्राधिकरणलिसे उच्चस्तरीय बैठक व अन्तरक्रिया यायेगु ज्याझ्वः दुगु खँ धाःगु दु ।
LEAVE YOUR COMMENTS