‘विपन्न, सीमान्तकृतया उत्थान ज्या जुयाच्वंगु दु’
येँ (नेपालभाषा टाइम्स) – बागमति प्रदेशया मुख्यमन्त्री इन्द्रबहादुर बानियां आदिवासी जनजाति, सीमान्तकृत व विपन्न समुदायया उत्थानया निंतिं प्रदेश सरकारं विशेष प्राथमिकता बियाः ज्या यानाच्वनागु खँ धयादीगु दु । नेपाल लोकतन्त्रवादी आदिवासी जनजाति महासंघया निक्वःगु राष्ट्रिय सम्मेलनयात सम्बोधन यायेगु झ्वलय् वय्कलं उगु खँ धयादीगु खः ।
मुख्यमन्त्री बानियां नेपाःया लोकतान्त्रिक आन्दोलन व संघीय गणतन्त्र हयेगु संघर्षय् आदिवासी जनजाति समुदायया तःधंगु बलिदान दुगु चर्चा यानादिसें नेपाली कांग्रेसया नेतात सर्वमान्य नेता गणेशमान सिंह, भीमबहादुर तामाङ व बखानसिंह गुरुङपिंत लुमंकादीगु दु ।
विपन्न व सीमान्तकृत समुदायया विद्यार्थीतय् उच्च शिक्षाय् पहुँच थ्यंकेत बागमति प्रदेश सरकारं प्रभावकारी ज्या यानाच्वनागु जानकारी बिसें वय्कलं चेपाङ, बोटे व जिरेल थें लिउने लाःगु समुदायया विद्यार्थीतय्त डाक्टर, इन्जिनियर व पशु चिकित्सक ब्वंकेत सरकारं पूर्ण छात्रवृत्तिया व्यवस्था यानागु खँ धयादीगु दु ।
उकथं हे वय्कलं बागमति प्रदेश सरकारं आदिवासी जनजातिया भाषिक अधिकारयात सुनिश्चित यानागु धासें नेपालभाषा व तामाङ भाषायात प्रदेशया सरकारी ज्या खँया भाषाया रुपय् कार्यान्वयनय् हयेधुनागु नं धयादीगु दु । वय्कलं आदिवासी जनजाति महासंघया भवन दयेकेगु निंतिं प्रदेश सरकारं छगू करोड तका विनियोजन यानागु व मगाःगु बजेट नं उपलब्ध याकेगु आश्वासन बियादीगु दु । उकथं हे मुख्यमन्त्री बानियां धर्म व्यक्तिया व्यक्तिगत आस्थाया विषय जूगु व राज्यं फुक्कं धर्मयात सद्भाव तयेमाःगु खँ नं धयादीगु दु ।
LEAVE YOUR COMMENTS