म्यानचेस्टर सिटीयात एफए कप

म्यानचेस्टर सिटीं एफए कपया उपाधि त्याकाः घरेलु उपाधिइ ह्याट्रिक याःगु दु । एफए कपया उपाधि त्याके न्ह्यः सिटीं काराबाओ कप व प्रिमियर लिग उपाधि त्याकेधुंकूगु दु । सिटी छगू हे सिजनय् स्वगुलिं घरेलु उपाधि त्याकूगु न्हापांगु टिम जूगु दु ।एफए कपया फाइनलय् सिटीं वार्टफोर्डयात ६—० गोलया तःधंगु अन्तरं बुकूगु खः ।

सिटीया घरेलु मैदानय् जूगु कासाय् रहिम स्टर्लिङ व ग्राबिल जिसस निगू गोल यात । अथेहे डेभिड सिल्भा व केविन डि ब्रुयन छगू छगू गोल याःगु खः ।सिटीं न्हापांगु हाफय् निगू व लिपांगु हाफय् प्यंगू गोल याःगु खः । आक्रामक कासा म्हितूगु सिटी सिल्भाया गोल कासाया २६ औं मिनेटय् अग्रता काल ।

न्हापांगु हाफया ३८ औं मिनेटय् जिससं गोल यानाः सिटीयात निगू गोलया अग्रता बिल । निगू्गु हाफया ६१ औं मिनेटय् डि ब्रुयन गोल यातसा ६८ औं मिनेटय् जिसस व्यक्तिगत निगूगु गोल यासें सिटीयात प्यंगू गोलया अग्रता बिल । रहिम स्ट्रलिङं कासाया ८१ आंै व ८७ आंै मिनेटय् झ्वःलाक निगू गोल यानाः वार्टफोर्डयात ६–० गोलं बुकूगु खः ।

म्यानचेस्टर सिटीया कप्तान भिन्सेन्ट कोम्पनीं उपाधि त्याकेधुकाः म्यानचेस्टर सिटी विश्वया उत्कृष्ट टिम जूगु खँ धाःगु दु । लिसें कोम्पनीं म्यानचेस्टर सिटी त्वःतेगु घोषणा नं याःगु दु । कोम्पनी सिटी पाखें ११ दँ कासा म्हितूगु खः । ३३ दँ दुम्ह डिफेन्डर कोम्पनी सिटीया निंतिं ३६० गू कासा म्हिताः २० गोल याःगु दु ।