ने. सं. ११४६ दिल्लागा चौथी -

धम्मवती गुरुमांया जन्मन्हि

सम्पादकीय

सुं मनू सिनावनाः सलंस द्वलंद्वः दँ लिपा नं वयागु नां ल्यनाच्वनीगु वा सदांया लागि म्वानाच्वनीगु धयागु व मनुखं यानावंगु भिंगु व बांलाःगु कर्म अर्थात् ज्यां यानाः खः । तर कर्म यायेत जीवन माः । जीवन हे मदुसा वं कर्म यायेफइमखु , अले जीवनया प्रारम्भ धयागु उम्ह मनूया जन्म खः ।

उकिं हे जुइ, थ्व संसारय् गुलि नं देय् दु , अले उगु देशय् गुलिं नं जातियापिं मनूत दु, इपिं सकसिंन जन्मयात तःधंगु महत्व बिया थःथःपिनि संस्कृतिकथं जन्मन्हि याइगु झीसं खंकेफइ । नेवाः समाजं नं जन्मन्हियात न्हापांनिसें हे तःधंगु महत्व बियावयाच्वंगु दु । जन्मन्हिबलय् त्वालय् हाकुहाम्वः तयाः वालातःगु धौबजि, सिसाबुसा व ध्यबा इनेगु, थःपिनि परम्परानिसें पुज्याना वयाच्वंपिं द्यःपिंयालिसे नौग्रहया प्रतीक गुताबीबः पुज्यायेगु अले सुकुन्दा च्याकाः ख्येंसंग कायेगु नेवाःतय्गु न्हांपानिसेया चलन खः । आः वयाः धाःसा गुलि गुलिसिनं विदेशी चलनकथं च्यानाच्वंगु मैनमत फू यानाः स्यायेगु व केक तायेगु नं यानाहःगु खनेदु ।

अथे ला थौंकन्हय्यापिं मनूतय्सं न्हून्हूकथं नं जन्मन्हि न्यायेकेगु यानाहःगु दु । गुलिसिंन विहारय् भन्ते गुरुमांपिंत भोजन याकेगु, गुलिसिनं वृद्धाश्रमय् च्वनाच्वंपिं ज्याथजिाथितय्त नयेगु वा वसः इनेगु, गुलिसिनं अस्पतालय् वनाः विरामीतय्त सिसाबुसा व मेमेगु निंगु नसाज्वंल इनेगु, गुलिसिनं हाःनाः मदुपिं मस्तय्त तइगु ‘बालगृह’ य् वनाः मस्तय्त नकेगु आदि यानाः नं थःपिनि जन्मन्हि न्यायेकेगु यानाहःगु दु ।

थुकिं यचुक सीदु कि जन्मन्हि, बुन्हिं, बुदिं , न्ह्यागु धायेगु याःसां थः बूगु न्हियात मनूतय्सं उत्सवया रुपय् हे नालाकयावयाच्वंगु दु । थःथःगु इच्छाकथं जन्मन्हि न्यायेकेगु यानावयाच्वंगु दु ।

थ्व सन्दर्भय् गुरुपुन्हिकुन्हु जन्म जुयाबिज्याःम्ह बुद्धशासनया धरोहर जुयाः धस्वाना च्वनाबिज्याम्ह सासनधज धम्माचारिय अग्गमहागन्थवाचक पण्डित धम्मवती गुरुमांया जन्मन्हि गुकथं न्यायेकाच्वंगु दु व विशेष चर्चा यायेबह जू । थुगुसी ९३ दँ दुम्ह गुरुमांया जन्मन्हि छुं दँ न्ह्यवंनिसें छवाःयंकं अभिधर्म पाठ यानाः व च्यान्हु दुकुन्हु महायान व वज्रयान धर्मगुरुपिनि पाखें पाठ यानाः न्यायेका वयाच्वंगु खःसा उगु परम्परा थुगुसी नं न्ह्यानाच्वंगु दु । थुकियात तसकं हे च्वछायेबहगु ज्या धकाः धायेमाः । धम्मवती गुरुमामं थःगु जन्मन्हिया उत्सवयात बुद्धसासन ल्यंकातयेगु ज्याय् तःधंगु योगदान जुइकथंयागु अवसरया रुपय् गुगु छ्यलाबिज्यात व प्रशंसायोग्य जू ।वसपोल धम्मवती गुरुमां सदां थथे हे बुद्धसासनया धरोहर जुयाः धस्वानाच्वना बिज्याःगु स्वये दयेमा !