चीनय् जुइगु टेनिस धेंधेंबल्लायात प्रतिबन्ध

एजेन्सी- विश्वन्यकं च्वंगु मिसा टेनिस कासामितय्गु सर्वोच्च निकाय वुमन्स टेनिस एसोसिएसन (डब्लुटिएं) चीनय् जुइगु दक्वकथं अन्तर्राष्ट्रिय टेनिस धेंधेबल्ला कासायात तत्कालया निंतिं प्रतिबन्ध तःगु दु । चीनया टेनिस कासामि पेङ सुआइया सुरक्षायात कयाः डब्लुटिएं थ्व निर्णय याःगु खः । चीनया पूर्व उपप्रधानमन्त्री झाङ गावोलीयात टेनिस कासामि पेङ सुआइं यौन दुव्र्यवहार याःगु द्वपं बिउगु खःसा वयां लिपा कासामि पेङ सुआइ सार्वजनिक रुपं खनेदुगु मदुनि ।

डब्लुटिएया प्रमुख स्टिभ साइमनं पेङ स्वतन्त्र व सुरक्षित दु धयागु खँय् थःत आशंका दु धाःगु खः । प्रमुख स्टिभं चीनय् थज्याःगु स्थितिइ कासामितय्सं धेंधेंबल्लाखय् गथे यानाः म्हिेफइ धकाः न्ह्यसः नं याःगु खः । चीनय् जुइगु धेंधेेंबल्लाखय् कासामितय्त व कर्मचारीतय्त खतरा दुगु नं स्टिभं धाःगु खः ।

मिसा डबल टेनिसया पूर्व नम्बर १ कासामि पेङ सुआइं वंगु नोभेम्बर २ तारिखय् चीनया पूर्व उपप्रधानमन्त्री झाङ गावोलीं यौन दुव्र्यहार याःगु द्वपं बिउगु खः । थ्वयां लिपा पेङ सार्वजनिक रुपं खनेमदुगुलिं विश्वन्यंक चीनयात दबाब वःगु खः । वंगु आइतवाः चीनया सरकारी सञ्चार माध्यमय् वयाः पेङं थः सुरक्षित दुगु धाःगु खःसां उकियात विश्वास यायेमफइगु अन्तर्राष्ट्रिय सञ्चार माध्यतय्स धया वयाच्वंगु दु । चीनं थ्व विषययात राजनीतिकरण याःगु नं धाःगु दु ।

कोरोनाया कारणं डब्लुटिएं वंगु निदँ न्ह्यवः निसें चीनय् छुं नं धेंधेंबल्लाः याःगु मदुनि ।

सम्बन्धित बुखँ

LEAVE YOUR COMMENTS