‘नेयमारयात कयाः सम्झौता मजूनि’

एजेन्सी – स्पेनिस ला लिगाय् कासामित ट्रान्सफर यायेगु ई निन्हु जक ल्यं दनिसां बार्सिलोनां ब्राजिलयन सुपरस्टार नेयमारयात क्लबय् हयेगु ‘डिल’ यायेफुगु मदुनि ।

नेयमारया आःया क्लब पेरिस सेन्ट जर्मनया स्पोर्टिब डाइरेक्टर लियोनार्डो नेयमारयात कयाः आःतक छुं सम्झौता मजूनिगु खँ धाःगु दु। थ्वयां न्ह्यव नेयमारयात स्पेन यंकेगु निंतिं बार्सा व पिएसजीया पदाधिकारीतय् दथुइ वंगु मंगलवाः सहलह जूगु सहलह सकारात्मक पाखे न्ह्याःवंगु खँ पिहां वःगु खः । बार्सां नेयमारया निंतिं २०० मिलियन युरो प्रस्ताव याःगु दु ।

पिएसजीया स्पोर्टिङ्ग डाइरेक्टर लियोनार्डों थःपिनिगु निंतिं थ्व प्रस्ताव मान्य मजूगु खँ धाःगु दु। मेखे ला लिगाय् ट्रान्सफरया ई धाःसा वइगु सोमवाः तक जक दु। बार्सा नेयमारयात दछिया लोनय् हयाः उ किया पलेसा डिफेन्डर जे क्लेर टोडिबो, मिडिफिल्डर इभान राकाटिक व फरवार्डर ओसमान डेम्बलेयात पिएसजीइ लोनय् छ्वयेगु प्रस्ताव नं तःगु खः, तर थ्व प्रस्तावयात स्वम्हं कासामितय्सं नं अस्वीकार याःगु दु ।

लियोनार्डों धाःगु दु, ‘नेयरमारयात छ्वयेगु निंतिं जिमिगु माग बारे सकसिनं सिउ । तर आःतक वःगु प्रस्ताव जिमिगु निंतिं मान्य कथं वःगु मदु। आः ट्रान्सफरया निंतिं स्वन्हु जक ल्यं दनि, तर आः तक छुं सम्झौता धाःसा जूगु मदुनि ।’

नेयरमा सन् २०१७ य् बार्सिलोना पाखें २२२ मिलियन युरों पिएसजी वंगु खः ।