पपुवा न्युगिनीयात बुकाः नेपाः एकदिवसीय मान्यता कायेगु लँय् सतिक थ्यन

येँ– दिपेन्द्र ऐरि ब्याट् नं बल नं चले जुइवं नेपालं थौं जूगु विश्वकप छनोट कासाय् पपुवान्युगिनियात खुगू विकेटं बुकूगु दु । थ्व विजय लिसें नेपाः एकदिवसय मान्यता कायेगु लँय् तसकं सतिक थ्यंगु दु । नेपाः आः न्हय्गूगु थाय्या निंतिं प्लेअफ म्हितेत छनोट जूगु दु ।
थौंं हे जुयाच्वंगु नेदरल्यान्ड व हंगकंग दथुया कासाय् यदि हंगकंग बुत धाःसा नेपाः एकदिवसीय मान्यता चूलाइ । यदि हंगकंग त्यात धाःसा नेपालं प्लेअफ कासाय् न्हय्गूगु थाय्या निंतिं हंगकंगयात बुकेमाःगु जुइ ।

नेपालंं थौं पपुवा न्यूगिनी न्हापां ब्याटिंग यानाः बिउगु ११५ रनया लक्ष्ययात २३ ओभरय् पूवंकूगु खः । नेपाःया ओपनिंग ब्याटस्म्यान चले मजूसां दिपेन्द्र ऐरी ५८ बलय् अर्धसतक दयेकूगु खः । ऐरी आरिफ शेख लिसे ६७ रनया साझेदारी यानाःनेपाःयात विजय लँपुइ न्ह्याकूगु खः । प्रारम्भिक ब्याट्सम्यान ज्ञानेन्द्र मल्ल १ रन व अनिल शाह ९ रनय् आउट जूगु खः । कप्तान पारस खड्का २० रनया योगदान बियाः पभेलियन वंगु खःसा आरिफं २६ रनया योगदान बिल ।

टस त्याकाःन्हापां बलिंग याःगु नेपालं पपुवा न्यू गिनीयात २७ ओभर २ बल म्हितूबलय् अलआउट याःगु खः । नेपाःया निंतिं सन्दीप लामिछाने व दिपेन्द्र सिंह ऐरिं प्यंगू प्यंगू विकेट काःगु खः । सन्दीपं उत्कृष्ट बलिंग यासें ८ ओभरय् २९ रन जक बियाः प्यंगू विकेट काःगु खः । मेगु निगू विकेट धाःसा सोमपाल कामी व करण केसीं काःगु खः ।

एकदिवसीय मान्यता चूमलाःगु शीर्ष स्वंगू देशं थ्व धेंधेंबल्लाःपाखें एकदिवसीय मान्यता चूलाकी । स्वंगू मध्ये सुपर सिक्सय् दुहां वनेधुंकूगु स्कटल्यान्ड व युएइयात एकदिवसीय मान्यता दइगु जुइधुंकूगु दुसा मेगु छगू थाय् काइगु देय् नेपाः व हंगकंग मध्ये छगू जुइ ।