म्यानचेस्टर सिटीं कीर्तिमान ल्याः काइगु आशा

म्यानचेस्टर सिटीया प्रशिक्षक पेप ग्वार्डिओलां थुगुसी सिटीं प्रिमियर लिगय् कीर्तिमानी ल्याः कायेत ताःलाइगु आशा प्वंकूगु दु । सर्जिओ एग्युरोया ह्याट्रिकया ग्वाहालिं वंगु चान्हय् न्यूकास्टलयात ३–१ गोलं बुकेधुंकाः ग्वार्डिओलां थ्व आशा प्वंकूगु दु ।
२०१२ व २०१४ या उपाधी विजेता सिटी आः १२ ल्याःया अग्रतासहित ६५ ल्याः कयाः शीर्षस्थानय् दु । निगूगु थासय् लानाच्वंगु म्यानचेस्टर युनाइटेडया ५३ ल्याः जक दु ।

चेल्सीं सन् २००४–०५ य् उपाधी त्याकूबलय् ९५ ल्याः काःगु खः । आः सिटीं थ्व कीर्तिमान त्वाःथलेगु खःसा ल्यंदुगु झिंप्यंगू कासाय् झिगू त्याकाः छगू बराबरी याःसा खः ।

वंगु चान्हय् जूगु कासाय् एग्युरों थःगु झिंछगूगु ह्याट्रिक पूवंकूगु दुसा थुगु सीजनय् जक थ्व वयागु निगूगु ह्याट्रिक खः । थ्वयां न्ह्यः वाटफोर्ड लिसे ६–० गोलं त्याःगु कासाय् नं वं ह्याट्रिक याःगु खः ।

वंगु चान्हय् जूगु मेगु कासाय् म्यानचेस्टर युनाइटेडं एन्टोनी मार्सलया छगू गोलया ग्वाहालिं बर्नलेयात १–० गोलं बुकल । अथेहे म्हिगः जूगु मेगु कासाय् चेल्सीं ब्रिघटनयात ४–० गोलं बुकलसा आर्सनलं नं क्रिस्टल प्यालेसयात ४–१ गोलं बुकूगु दु ।

सम्बन्धित बुखँ

LEAVE YOUR COMMENTS