महिला एसियन कप छनोटया कासा उज्वेकिस्तानय् जुइगु

एजेन्सी- एएफसी महिला एसियन कप–२०२२ अन्तर्गत समूह एफया छनोट कासा उज्वेकिस्तानय् जुइगु जूगु दु । न्हापा थ्व कासा नेपालय् जुइगु धयातःगु खःसां कोरोना महामारीया कारणं उज्वेकिस्तानय् यायेत्यंगु खः । एन्फाया महासचिव इन्द्रमान तुलाधरं बिउगु जानकारीकथं नेपालय् न्हियान्हिथं कोरोना संक्रमण अप्वया वयाच्वंगुलिं छनोट कासा नेपालय् मयासे उज्वेकिस्तानय् यायेमाःगु जानकारी बियादीगु खः । महासचिव तुलाधरया कथं एसियाली फुटबल महासंघं (एएफसी) एन्फायात छनोट कासा उज्वेकिस्तानय् यायेत्यंगु जानकारी बीधुंकूगु दु ।

एसियन कप–२०२२ अन्तर्गत समूह एफया छनोट कासाया नेपाःया पुचलय् फिलिपिन्स व हङकङ दु । छनोट कासा म्हितेत नेपाःया राष्ट्रिय टिमं बन्द प्रशिक्षणय् अभ्यास यानाच्वंगु दु । नेपाःया टिमं घरेलु मैदानया लबः कयाः बल्लाःगु फिलिपिन्स व हङकङया टिमलिसे म्हितेत स्वयाच्वंगु खः । बन्द प्रशिक्षणय् मुख्य प्रशिक्षक ग्यारी फिलिप्सं ४५ म्ह कासामितय्त प्रशिक्षण बियाच्वंगु दु ।