डि लिटय् बार्सिलोनाया मिखा

स्पेनिस महारथी बार्सिलोनां आयाक्सया १९ दँ दुम्ह कप्तान म्याथिज डी लिटयात बार्सिलोना हयेगु तयारी यानाच्वंगु दु । आयाक्स व नेदरल्याण्डया डिफेन्डर डी लिट याकनं हे बार्सिलोना लिसे अनुबन्धित जुइगु खँ क्लब धाःगु दु । च्याम्पियन्स लिगय् आयाक्सयात सेमिफाइनल तक थ्यंकेत उत्कृष्ट प्रदर्शन याःगुलिं डी लिट बार्सिलोनाया मिखाय् लाःवंगु खः ।

आयाक्स रियल म्याड्रिड व युभेन्टसयात बुकाः सेमिफाइनलय् प्रवेश याःगु खः । डि लिट व बार्सिलोना दथुइ ७० निसे ७५ मिलियन युरोया सम्झौता जूगु समाचार नं वयाच्वंगु दु । बार्सिलोना लिसें लिभरपुल, युभेन्टस व म्यानचेस्टर युनाइटेड नं डी लिट नाप सम्झौता यायेत स्वयाच्वंगु दु ।

च्याम्पियन्स लिगया सेमिफाइनलय् लिभरपुल नाप पराजित जूगुलिं बार्सिलोनां पुलांपिं कासामि मियाः न्हूपिं युवा कासामि क्लब हयेत स्वयाच्वंगु दु । थ्व हे झ्वलय् बार्सां आयाक्सया युवा मिडफिल्डर फ्रान्की डी जोङयात अनुबन्धन यायेधुंकूगु दु । बार्सां डी जोङ लिसे ७५ मिलियन युराें अनुबन्धन याःगु खः ।