स्पेन युरो कपया फाइनलय्
येँ (नेपालभाषा टाइम्स)÷ स्पेन युरो कपया फाइनलय् थ्यंगु दु । मंगलवाः चान्हय् जूगु कासाय् फ्रान्सयात २–१ गोलं बुकुसें स्पेन फाइनलय् दुहां वंगु दु ।
कासाया च्यागूगु मिनेटय् हे कोलो मुआनीं हेड पाखें गोल यासें फ्रान्सयात अग्रता बिउगु खः । केलियन एम्बाप्पेया पासय् मुआनीं गोल याःगु खः । सेमिफाइनल तक थ्यंगु फ्रान्सं थुगुसीया धेंधेंबल्लाखय् याःगु थ्व न्हापांगु गोल खः । मेमेगु कासाय् विपक्षी टिमपाखें याःगु आत्मघाती गोलया ग्वाहालिं फ्रान्स सेमिफाइनल तक थ्यंगु खः ।
स्पेनं प्यंगू मिनेटया दुने निगू गोल यासें फ्रान्सयात बुकूगु खः । छगू गोलं लिउने लानाच्वंगु स्पेनया निंतिं कासाया २१ औं मिनेटय् लामिनेट यमालं गोल यासे कासा बराबरी याःगु खः । आइतवाः जुइगु फाइनल छन्हु न्ह्यः झिंन्हय्दँ बुन्हि हनेत्यंम्ह यमाल युरो कप धेंधेंबल्लाखय् गोल याःम्ह दकलय् म्हो उमरेया कासामि नं जूगु दु । कासाया २५ औं मिनेटय् डानी ओल्मों थ्वाःगु बल फ्रान्सया डिफेन्डरया तुतिइ लानाः गोल जूगु खः ।
थ्व लिपा निगुलिं टिमं गोल जुइमफयेवं स्पेनं फाइनलय् थाय् दयेकूगु खः । आः स्पेनं कन्हय् जुइगु इंग्ल्यान्ड व नेदरल्यान्ड दथुया विजेता लिसे आइतवाः फाइनल कासा म्हिती ।
LEAVE YOUR COMMENTS