अर्जेन्टिना क्वाटरफाइनलय्

एजेन्सी- लियोनल मेसी थ:गु क्यारियरया १००० औं कासाय् गोल यायेत ता:लायेवं अर्जेन्टिना कतारय् जुयाच्वंगु विश्वकपया क्वार्टरफाइनलय् दुहां वनेत ता:ला:गु दु । आइतवा: सुथय् जूगु कासाय् अर्जेन्टिनां अस्ट्रेलियायात २–१ गोलं बुकूगु ख: । अर्जेन्टिनाया निंतिं थप छगू गोल अल्भारेजं यात ।

मेसीं कासाया ३५ औं मिनेटय् गोल यासें अर्जेन्टिनायात अग्रता बिउगु ख: । विश्वकपय् मेसीया थ्व गुंगूगु गोल ख: ।

कासाया ५७ औं मिनेटय् अस्ट्रेलियाया गोलकिपर म्याट रायनया गल्तीया लब: कासें अल्भारेजं थप गोल या:गु ख: । निगू गोलं न्ह्य:ने ला:गु अर्जेन्टिना कासा क्वचाये १३ मिनेट न्ह्य: आत्मघाती गोलया कारणं गोल नयेमा:गु ख: । अस्ट्रेलिया क्यारिग गुडम्यानया प्रहरयात पनेगु झ्वलय् इन्जो फर्नान्डिजपाखें आत्मघाती गोल जूगु ख: । थ्व लिपा निगुलिं टिमं गोल यायेमफेवं अर्जेन्टिनां क्वाटर्रफाइनलय् दुहांवंगु ख: ।

अर्जेन्टिनां आ: नेदरल्यान्डलिसे क्वार्टरफाइनल कासा म्हितीगु जुइ । थ्व कासा वइगु शनिवा: सुथय् पौन १ बजे जुइ ।