लेभरकुजनं ब्रेमनयात बुकल

म्युनिख (एजेन्सी) – जर्मन बुंडेसलिगाय् सोमवा: बहनी जूगु कासाय् बायर लेभरकुजनं व्रेडर ब्रेमनयात ४–१ बुकूगु दु । थ्व प्रभावशाली जितलिपा लेभरकुजन शीर्ष प्यंगु टिम दथुया दूरी छगू ल्याखय् हयेत नं सफल जुल । लेभरकुजनया थ्व जितया नायक धा:सा केइ हाभेर्टज सावित जुल । व २८ व ३३ औ मिनेटय् गोल या:गु ख: । अथेंतु लेभरकुजनया नितिं मिखेल वेइसर व केरेम डिमरबे नं गोल यात । थ:गु घरेलु मैदानय् बुइवं ब्रेमनया स्थिति धा:सा कमजोर जूगु दु । क्लब रेलिगेसन जोनय् दु व सन् १९६३ धुंका: निक्व:गु खुसी निगूगु डिभिजनय् कुँहा वनिगु सम्भावनापाखे दु ।