टि–२० विश्वकप एसिया छनोट नेपाः ग्लोबल छनोटया निंतिं असफल

येँ – सिंगापुरपाखें ८२ रनं लज्जास्पद पराजय लिपा नेपाःया टि–२० विश्वकप म्हितेगु म्हगस क्वःदःगु दु । म्हिगः जूगु कासाय् पराजय लिपा विश्व वरियताया झिंछगूगु थासय् लानाच्वंगु नेपाः टि–२०या ग्लोबल छनोट तकं म्हिते मखनीगु जूगु दु । सन् २०२० य् अस्ट्रेलियाय् जुइगु विश्वकपय् मुक्कं झिंखुगू देशं ब्वति काइ ।

नेपाःयात पराजित यायेत ताःलाःगु सिंगापुर ग्लोबल छनोटय् दुहां वंगु दु । म्हिगः जूगु कासाय् सिंगापुरं न्हापां ब्याटिङ्ग यासें १९२ रनया लक्ष्य बिउगु खः । लिसलय् ब्याटिङ्ग याःगु नेपाः १५ ओभरय् मुक्कं १०९ रन दयेकाः अलआउट जूगु खः । नेपालं आक्रामक शुरुवात याःगु खःसां ब्याटिङ कमजोर जुइवं पराजय फयेमाःगु खः ।

थ्वयां न्ह्यवया कासाय् विस्फोटक ब्याटिङ यानाच्वंपिं कप्तान पारस खड्का व उपकप्तान ज्ञानेन्द्र मल्ल नं बांलाःगु स्कोर दयेकेमफुत । विस्फोटक ब्याटिङ यायेगु झ्वलय् निगू ओभरय् २४ रनया साझेदार याःपिं कप्तान खड्का १२ रनय् आउट जुलसा उपकप्तान मल्लं ३९ रन दयेकल । नेपाःया निंतिं दीपेन्द्र सिंह ऐरीं २३, सोमपाल कामी ११ रन दयेकलसा मेपिंसं दोहोर अंकया रन तकं दयेकेमफुत ।

सिंगापुरया निंतिं सेलाडेर विजयकुमारं प्यंगू व विनोथ बसकरणं निगू विकेट काःगु खः ।अघोषित फाइनल थें जूगु म्हिगःया कासाय् सु त्यात व मेगु चरणया छनोट दुहां वनीगु खः । थ्व कासाय् सिंगापुरं १९१ रनया विशाल योगफल दयेकेत ताःलाःगु खः । टि–२० अन्तर्राष्ट्रिय क्रिकेटय् नेपाः विरुद्ध छुं नं देशं दयेकूगु थ्व आःतकया दकलय् अप्वःगु योगफल खः ।

थ्वयां न्ह्यव थगुने नेदरल्यान्डं नेपाः विरुद्ध दकलय् अप्वः १७४ रन दयेकूगु खः । म्हिगःया कासाय् डेभिडं सिंगापुरया निंतिं दकलय् अप्वः ७७ रन दयेकल । थ्व झ्वलय् वं ४३ बल म्हिताः प्यंगू चौका व स्वंगू छक्का थ्वाःगु खः । अथेहे रोहन रंगराजनं ४९, मनप्रित सिंह ४२ रन दयेकल ।

नेपाःपाखें अनुभवी कासामि वसन्त रेग्मीं हे प्यंगू ओभर ५४ रन बिउगु खः । नेपाःपाखें आः म्हितूगु अन्तर्राष्ट्रिय कासाय् थ्व हे दकलय् खराब बलिङ जूगु दु । नांजाःम्ह कासामि सन्दीप लामिलानें नं स्वंगू ओभरय् ३४ रन दयेकल । तर थुपिं निम्हेसिनं छगू नं विकेट कायेमफुत ।
नेपाःया निंतिं अविनाश बोहरां प्यंगू व करण केसीं निगू विकेट काःगु खः ।

उपविजेता मेडल लितकाल
कासा लिपा नेपाःयात उपविजेता घोषणा यानाः कासामितय्त मेडल क्वखायेकूगु खः । तर उपविजेताया ट्रफि बीत्यंगु इलय् नेपाः उपविजेता मखुत धासें हाकनं मेडल लित काःगु खः । नेपाः व कतारया ४–४ अंकं जूगु खः, रनरेटया आधारय् कतार उपविजेता जुइमाः खः ।

तर आयोजकया गल्तीं नेपाःयात उपविजेता घोषणा यानाः मेडल क्वखायेकूगु खः । सकलें कासामितय्सं मेडल क्वखायेधुंकाः नेपाः स्वंगूगु थासय् लाःगु धायेवं कासामितय्सं क्वखायातःगु मेडल त्वःताः लितबिउगु खः ।