भारतय् हाकनं लडाकु विमान दुर्घटना

भारतय् हाकनं छगः लडाकु विमान मिग २७ दुर्घटना जूगु दु । भारतया राजस्थानया जोधपुर धाःथासय् आइतवाः सुथय् विमान दुर्घटना जूगु खः । नियमित उडानय् वनाच्वंगु विमानया पाइलट धाःसा सकुशल दुगु खँ धाःगु दु । वायुसेनां विमान दुर्घटनाया अनुसन्धान यायेत आदेश बीधुंकूगु दु । जोधपुरं थ्यंमथ्यं १२० किलोमिटर दक्षिणय् थ्व दुर्घटना जूगु खः ।

इन्जिनय् खराबी वःगु कारणं मिग २७ दुर्घटना जूगु प्रारम्भिक रिपोर्ट वःगु खँ धाःगु दु । वंगु मार्च ८ तारिखय् नं राजस्थानया बिकानेर इलाकाय् मिग २१ विमान दुर्घटना जूगु खः। रुसय् दयेकातःगु भारतया मिग लडाकु विमान थौंकन्हय् छगू लिपा मेगु दुर्घटना जुइगु जुयाच्वंगु दु । वंगु फेबु्रअरी १ य् रुसय् हे दयेकूगु मिराज २००० लडाकु विमान नं दुर्घटना जूगु खः ।

थ्व दुर्घटनाय् निम्ह पाइलट सीगु खः । अथेहे फेबु्रअरी १२ य् राजस्थानया पोखरण लिक्क नं मिग २७ विमान दुर्घटना जूगु खः । मेखे भारतं फ्रान्सय् दयेकूगु राफेल लडाकु विमान सहित न्हूगु मोडलया लडाकु विमान न्यायेगु कुतः यानाच्वंगु दुसां विमान खरिदय् भ्रष्टाचार जूगु कारणं सफल धाःसा जुइफयाच्वंगु मदु ।

सम्बन्धित बुखँ

LEAVE YOUR COMMENTS