पत्रकार किलम्बुयात हरिलाल श्रीलक्ष्मी पत्रकारिता सिरपाः

थिमि (नेपालाभाषा टाइम्स) -नेवाः पत्रकार राष्ट्रिय दबू ख्वप शाखां बिया वयाच्वंगु ‘हरिलाल श्रीलक्ष्मी पत्रकारिता सिरपाः’ थुगुसी कान्तिपुर टेलिभिजनया संवाददाता नारायणसुन्दर किलम्बुयात लःल्हाःगुु दु । पत्रकार दबू ख्वपया झिंनिक्वःगु दँमुँज्या व न्याक्वःगु तःमुँज्याय् उगु सिरपाः लःल्हाःगु खः ।

मूपाहां संघीय सांसद मदनकृष्ण श्रेष्ठं पत्रकार किलम्बुयात उगु सिरपाः लःल्हानादीगु खः । उगु सिरपाः राष्ट्रिय समाचार समिति (रासस)या फोटो पत्रकार रत्नकृष्ण श्रेष्ठं ख्वपया कला, संस्कृतिप सम्पदा संरक्षणय् योगदान बिउपिं पत्रकारयात लःल्हायेकथं थः मांअबुया नामं नीस्वनादीगु खः । उगु सिरपाः झिद्वः तका दांया खः ।

ज्याझ्वलय् मूपाहां सांसद श्रेष्ठ, दबूया ख्वप कचाया नायः रामगोपाल तमखु, मध्यपुर थिमि नगरपालिकाया उपप्रमुख विजयकृष्ण श्रेष्ठ, सम्मानित व्यक्तित्व किलम्बु लगायतं थःथःगु नुगःखँ लिसें भिंतुना न्वचु तयादीगु खः ।

तःमुँज्यां पत्रकार दबू ख्वपया न्हूगु ज्यासना पुचः नं ल्यःगु खः । चन्द्रकृष्ण श्रेष्ठ (गोपाल)या अध्यक्षताय् सुरेश श्रेष्ठ न्वकु, रेणु त्वानाबासु मिसा न्वकु, देवेन्द्र प्रजापति छ्याञ्जे, सत्यराम कासिछ्वा लिउछ्याञ्जे, विमला शाक्य मिसा लिउछ्याञ्जे, प्रकाश मल्ल दांभरिं व दुजलय् वीरेन्द्र खाइजु, उषाकिरण राणा श्रेष्ठ, रवीन्द्र किजु, नेत्रमान कर्माचार्ययात ल्यःगु दु ।

थुकथं हे पत्रकार दबूया केन्द्रीय पार्षदय् रत्नकाजी प्रजापति, विश्वराम दुवाल, कृष्ण किसि, रामगोपाल तमखुयात ल्यःगु दुसा प्रदेश पार्षदय् श्यामकुमार था, हरिबहादुर श्रेष्ठ, ज्ञानदेश श्रेष्ठ व राजन गरुयात सर्वसम्मतं ल्यःगु दु ।