मानन्धर संघया सुभाय् देछा ज्याझ्वः

येँ (नेपालभाषा टाइम्स) – केन्द्रीय मानन्धर संघया नकतिनि क्वचाःगु ३६ क्वःगु केन्द्रीय तःमुँज्या ताःलाकेत ग्वाहालि यानादीपिंत वंगु शनिवाः छगू ज्याझ्वःया दथुइ सुभाय् देछाःगु दु ।

दैसाः त्वालय् जूगु ज्याझ्वलय् तःमुँज्याय् संघया न्हूगु ज्यासना पुचः ल्ययेगु निंतिं निर्वाचन कमिटीइ च्वनाःदीपिं, पुलांगु ज्यासना पुचःया दुजःपिं व संघयात थीथी ज्याझ्वः, गतिविधिया निंतिं बजेट व्यवस्थापन यानाः विशेष ग्वाहालि यानादीम्ह येँ महानगरपालिकाया प्रवक्तालिसें १७ वडाअध्यक्ष नविन मानन्धर, बागमति प्रदेशया पुलांम्ह मन्त्री वसन्त मानन्धर, येँ महानगरपालिका १९ वडाअध्यक्ष राजेश श्रेष्ठपिंत सुभाय् पौ देछाःगु खः ।

ज्याझ्वलय् पाहांपिं येँ महानगर प्रवक्ता नविन मानन्धर, १९ वडाअध्यक्ष राजेश श्रेष्ठ, बागमति प्रदेशया पुलांम्ह मन्त्री वसन्त मानन्धर, संघया निवर्तमान उपसभापति बद्रीनारायण मानन्धर, न्हूम्ह उपसभापति सन्देश मानन्धर, सचिव केके मानन्धर, कोषाध्यक्ष गजेन्द्रप्रसाद मानन्धर, निर्वाचन कमिटीया संयोजक पंचकुमारी मानन्धर लगायतं थःपिनि नुगःखँ तयादीगु खः । ज्याझ्वः संघया निवर्तमान सभापति नारायणदास मानन्धरया सभापतित्वय् जूगु खः ।