अमेरिकी राष्ट्रपति चुनाव : थुगुसी लिच्वः पिहां वये लिबायेफु

एजेन्सी – अमेरिका राष्ट्रपति निर्वाचनया निंतिं मतदान जूगु दु। तर थुगुसी राष्ट्रपतिया प्रतिस्पर्धी डोनाल्ड ट्रम्प वा जो बाइडेन मध्ये सु त्याइ धयागु लिच्वः वयेत धाःसा छुं लिबायेफुगु खँ धाःगु दु । सामान्यतः अमेरिका मतदान क्वचायेवं उकुन्हु हे चान्हय् निसें लिच्वः वयेगु सुरु जुयाः सुथय् तकया दुने सामान्यतः सु त्याइ धयागु सीदयेधुंकूगु खः । तर थुगुसी धाःसा अथे मजुइफुगु खँ धाःगु दु। थुकिया कारण खः – हुलाक मार्फत जूगु चुनाव ।

थुगुसी कोरोना महामारीया कारणं यक्व हे अमेरिकी मतदातातय्सं न्ह्यव हे हुलाक मार्फत मतदान याःगु दु। सन् २०१६ या चुनावया इलय् ३ करोड ३०लाख मतदातातय्सं हुलाक मार्फत अग्रीम मतदान याःगु खः । तर थ्व पालय् ६ करोड ९५ लाख मतदातातय्सं मतदानया मू न्हि स्वयां छन्हु न्ह्यव हे हुलाक मार्फत मतदान यायेधुंकूगु दु। कोरोना भाइरसया महामारीया कारणं थुगुसी ८ करोड २० लाख मनूतय्त हुलाकमार्फत मतदान यायेत इनाप याःगु खः ।

मिशिगन राज्यय् जक ३० लाख मनूतय्सं हुलाकपाखें मतदान याइ । तर थनया मतगणना कन्हय् कुन्हु सुथय् बजे धुंकाः जक याइ । थुगुसी सुं छम्ह उम्मेदवारं स्पष्ट रुपं यक्व मताअन्तरं त्याइगु जुल धाःसा जक मतदान जूगु न्हिया चान्हय् दुने हे सु त्याइ धयागु खँ सीदयेफु, मखुत धाःसा लिच्वः पिहां वयेत लिबायेफुगु खँ धाःगु दु ।

अमेरिकाय् चुनावया लिच्वः पितबीगु खँय् अनया सञ्चारमाध्यमतय् दथुइ तसकं प्रतिस्पर्धा जुइ । न्हापा न्हापा नं चुनाव जुइवं प्रमुख टेलिभिजनतय्सं पूवंक मतगणना जुइ न्ह्यः हे लिच्वः पितबीगु याना वयाच्वंगु दु। मतदान क्वचायेवं मत सर्वेक्षण याइगु कम्पनीत लिसे जानाः टेलिभिजन सञ्जालतय् दथुइ विजेता घोषणा यायेत प्रतिस्पर्धा जुइ । सञ्चारमाध्यमतय्सं लिच्वः घोषणा यायेधुंकाः पराजित जूम्ह उम्मेदवारं नं हार स्वीकार यायेधुंकी । तर थुगुसी धाःसा अमेरिकाय् राष्ट्रपति जुइम्ह मनूया नां न्यनेत धाःसा भचा अप्वः पीमालीगु खनेदु ।