जन–चिकित्सालय न्ह्यःखाया न्हूगु ज्यासना पुचः

येँ (नेपालभाषा टाइम्स) – येँ महानगरपालिका २५ वडा न्ह्यःखाय् च्वंगु जन चिकित्सालयया ४३ क्वःगु दँमुँज्या व १५ क्वःगु तःमुँज्या वंगु शनिवाः छगू ज्याझ्वःया दथुइ क्वचाल । उगु तःमुँज्यां चिकित्सालयया न्हूगु ज्यासना पुचःया ल्यज्या नं याःगु खः ।

चिकित्सालयया अध्यक्ष विमला मानन्धरया सभापतित्वय् जूगु ज्याझ्वलय् उपाध्यक्ष दीलिपमान श्रेष्ठं लसकुस यानादीगु खः । ज्याझ्वलय् महासचिव किशोरमान वैद्यं चिकित्सालयया वार्षिक प्रगति विवरण व कोषाध्यक्ष दिनेशप्रसाद कायस्थं आर्थिक विवरण न्ह्यब्वयादीगु खः । अध्यक्ष मानन्धरं संस्थाया वर्तमान स्थिति व अवस्था न्ह्यब्वयादिसें संस्थाया निंतिं थीथी कथं ग्वाहालि याना वयाच्वनादीपिंत सुभाय् देछानादीगु खः ।

उगु तःमुँज्यां विमला मानन्धरया हे अध्यक्षताय् झिम्हेसिया न्हूगु ज्यासना पुचःया नं ल्यज्या याःगु खः । ल्यज्याकथं न्हूगु ज्यासना पुचलय् उपाध्यक्षय् दीलिपमान श्रेष्ठ, महासचिवय् राजेन्द्र मानन्धर ‘नीलः’, सचिवय् लिवाङ प्रधान, कोषाध्यक्षय् दिनेशप्रसाद कायस्थ च्वनादीगु दु ।

थुकथं हे दुजलय् किशोरमान वैद्य, अम्बिका श्रेष्ठ, प्रयागराज श्रेष्ठ, महेन्द्रमान वैद्य व रजनी स्थापित तुलाधरयात ल्यःगु दु । न्हूगु ज्यासना पुचलय् निर्वाचित जुयादीपिंत चिकित्सालयया आजीवन दुजःलिसें निर्वाचन अधिकृत पुरुषोत्तमलाल श्रेष्ठं दसिपौ लःल्हानादीगु खः ।