अमेरिकाय् रेष्टुरेन्टय् आक्रमण प्यम्ह सित

येँ (बीबीसी) – अमेरिकी राज्य टेनेसीया नैशविल शहरं पिने लाःगु इलाकाया छगू रेस्टुरेन्ट गोली चले जुयाः प्यम्ह सीगु दुसा निम्ह घाःपाः जूगु दु । स्थानीय ई कथं सुथसिया ३ बजे २५ मिनेट नैशविलया दक्षिण–पूर्वी उपनगर एनिटोच च्वंगु रेस्टुरेन्टय् सेमी अटोमेटिक बन्दुकं गोलीं कयेकूगु खँ धाःगु दु ।

उगु इलय् छम्ह रेष्टुरेन्टय् नयेत वयाच्वंम्हेस्या गोली प्रहार याम्हेसित आक्रमण यानाः वयाके च्वंगु बन्दुक लाकाकाःगु खःसा वयां लिपा आक्रमणकारी फरार जूगु खः ।स्थानीय प्रहरी आक्रमण याम्ह २९ दँया ट्रैविस रेनकिंग जूगु खँ धाःगु दु । प्रहरी वयात मालेगु ज्या जुयाच्वंगु धासें प्रहरी प्रवक्ता डाँन एरोनं ट्रैविस वंगु दँय् ह्वाइत हाउसया प्रतिबन्धित क्षेत्रं ज्वनागु खँ धाःगु दु ।

आक्रमणकारी ट्रैविसं पिकअप भ्यानय् च्वनाः रेष्टुरेन्ट न्ह्यःने थ्यंकः वःगु खःसा गाडी कुहां वयेसाथं रेष्टुरेन्ट पिने निम्हेसित गोलीं कयेकाः स्याःगु खःसा वयां लिपि रेष्टुरेन्ट दुने वनाः गोली कयेकू बलय् निम्हेसित गोली लाःगु खः । गोली कयाः स्वम्ह घटनास्थलय् मदुगु खःसा छम्ह वासः यायेगु झ्वलय् मदुगु खँ धाःगु दु । प्रहरीया कथं आक्रमणकारी नांगाः वःगु खःसा वं सालूगु छपाः ज्याकेत ज्वनावःगु खःसां नं आक्रमण लिपा उगु ज्याकेत नं लँय् तुं कुतुं वंगु खः ।