कोरोना संक्रमणं सीपिं २१ हजार २९३ थ्यन
एजेन्सी – कोरोना भाइरसं विश्वन्यंकं सीपिनि ल्याः नीछद्वलं मल्याक थ्यंगु दु । बिहिवाः सुथय् तकया दुने विश्वन्यंकं कोरोनां सीपिनि ल्याः २१ हजार २९३ म्ह थ्यंगु दु । विश्व स्वास्थ्य संगठनं पितबिउगु तथ्यांक कथं विश्वन्यंकं ४ लाख ७१ हजार ३११ म्हेसित कोरोनाया संक्रमण जूगु दुसा थुपिं मध्ये छगू लाख १४ हजार ६४२ म्ह जक उपचार लिपा छेँय् लिहां वंगु दु । मेपिं ३ लाख ३५ हजार ३७१ म्ह उपचार याकाच्वंगु दु ।
कोरोनां थौंकन्हय् युरोपेली देय् इटली व स्पेनया भयावह स्थिति कयाच्वंगु दु । इटलीइ जक थ्व भाइरसया संक्रमणं ७ हजार ५०३ म्हेसिया ज्इान वनेधुंकूगु दुसा आः ७४ हजार ३८३ म्ह संक्रमित जुइधुंकूगु दु । अथेहे स्पेनय् थ्व भाइरसया संक्रमणं ३ हजार ६४७ म्हेसिया ज्यान वनेधुंकूगु दुसा ४९ हजार ५१५ म्हेसित संक्रमण जूगु दु । कोरोनाया संक्रमणं चीनय् ३ हजार २८७ म्हेसिया ज्इान वंगु खःसा ८१ हजार २८५ म्हेसित संक्रमण जूगु खः । आः दकलय् न्हापां संक्रमण खनेदुगु चीनय् स्वयां इटली व स्पेनय् सीपिनि ल्याः अप्वयेधुंकूगु दु ।
इरानय् नं थ्व भाइरसया संक्रमणं २ हजार ७७ म्हेसिया ज्यान वनेधुंकूगु दु । अथेहे अमेरिकाय् १ हजार ३१ म्हेसिया ज्यान वंगु दुसा जर्मनी २०६ म्हेसिया ज्यान वंगु दु । अमेरिकाय् देय् न्यंकं न्यना वनेधुंकूगु थ्व भाइरसं ६८ हजार ३६७ म्हेसित संक्रमण यायेधुंकूगु दु । थन मुक्कं ३९४ म्ह जक उपचार लिपा छेँय् लिहां वनेत ताःलाःगु दु । फ्रान्सय् नं थ्व भाइरसं १ हजार ३३१ म्हेसिया ज्यान वनेधुंकूगु दु ।
बिहिवाः तक थ्व भाइरस संक्रमण जुयाः सीपिं मदुगु देशय् नेपाः लिसें म्यानमार, काजाकिस्तान, माली, चाड, भुटान, लिबिया, सिरिया, पपुवा न्युगिनी, अंगोला, फिजि, हाइटी थें ज्याःगु छुं छुं देय् जक लानाच्वंगु दु ।
(ने. सं. ११४० चाैलाथ्व द्वितीया / वि. सं २०७६ चैत १३, बिहिवाः)
LEAVE YOUR COMMENTS