युभेन्टस व सिटी क्वार्टरफाइनलय्, रोनाल्डोया च्यागूगु ह्याट्रिक

इटालियन सिरी ‘ए’या शीर्ष थासय् लानाच्वंगु युभेन्ट्स व इंग्लिस प्रिमियर लिगया शीर्ष थासय् लानाच्वंगु म्यानचेस्टर सिटी च्याम्पियन्स लिगया क्वार्टरफाइनलय् प्रवेश याःगु दु । युभेन्टसं स्पेनिस क्लब एथ्लेटिको म्याड्रिडयात व म्यानचेस्टर सिटी जर्मन क्लब शाल्केयात बुकूगु खः । मंगलवाः जूगु प्र्रि–क्वाटरफाइनलया निगूगु लेगय् युभेन्टसं एथ्लेटिको म्याड्रिडयात ३–० गोलं बुकूगु खः ।

न्हापागुं लेगय् २–० गोलं पराजित जूगु युभेन्टसं थ्व विजय लिपा समग्रय् ३–२ गोलं त्याकाः क्वार्टरफाइनलय् दुहांवंगु खः । न्हापागुं लेगय् पराजित जुयाः दबाबय् लानाच्वंगु युभेन्टसया निंतिं थ्वहे सिजन निसें रियल म्याड्रिडं युभेन्टस वःम्ह स्टार कासामि क्रिष्टियानो रोनाल्डाें ह्याट्रिक याःगु खः । रोनाल्डों न्हापांगु हाफ छगू व निगूगु हाफय् निगू गोल याःगु खः ।

कासाया २७ औं मिनेटय् रोनाल्डाें न्हापागुं गोल याःगु खःसा निगूगु हाफया ४९ औं मिनेटय् निगूगु व ८६ औं मिनेटय् पेनाल्टी पाखें स्वंगूगु गोल याःगु खः । रोनाल्डोया च्याम्पियन्स लिगय् थ्व च्यागूगु ह्याट्रिक खःसा च्याम्पियन्स लिगय् १२४ गू गोल थ्यंगु दु । थुकिया लिसें रोनाल्डाें च्याम्पियन्स लिगय् लियोनल मेसीया रेकर्डया बराबरी नं याःगु दु ।

मेसीं नं च्यागू हे ह्याट्रिक यायेधुंकूगु दु । मेगु कासाय् म्याचेस्टर सिटीं शाल्केयात ७–० गोलया तःधंगु अन्तरं बुकल । न्हापांगु लेगय् ३–२ गोलं कासा त्याकूगु सिटीं निगूगु लेगय् ७–० गोलं बुकाः समग्रय् १०–२ गोलं कासा त्याकाः क्वार्टरफाइनलय् ¦वेश याःगु खः । न्हापांगु हाफय् स्वंगू गोल याःगु सिटी निगूगु हाफय् थप प्यंगू गोल याःगु खः ।

न्हापांगु हाफय् अग्युरों निगू व सानें छगू गोल यातसा निगूगु हाफय्् रहिम स्ट्रलिङ्ग, बर्नाडो सिल्भा, फोडेन व ग्रबिल जिससं छगू छगू गोल याःगु खः । अग्युराें कासाया ३५ औं मिनेटय् पेनाल्टी पाखें न्हापांगु गोल यातसा वया थ्वयां स्वंगू मिनेट लिपा ३८ औं मिनेटय् निगूगु गोल याःगु खः । कासाया ४२ औ मिनेटय् सानें गोल यानाः सिटीयात स्वंगू गोलया अग्रता बिल ।

अथेहे निगूगु हाफया ५६ औं मिनेटय् रहिम स्ट्रलिङ्ग, ७१ औं मिनेटय् बर्नाडो सिल्भा, ७८ औं मिनेटय् फोडेन व ८४ औं मिनेटय् जिससं छगू छगू गोल याःगु खः । म्यानचेस्टर सिटीं शाल्केया पोस्टय् १५ गू प्रहार याःगु खःसा शाल्कें मुक्कं निगू जक प्रहार यायेफत ।

सम्बन्धित बुखँ

LEAVE YOUR COMMENTS