नगदेशय् धर्मचक्र प्रवर्तन दिवस
थिमि (नेपालभाषा टाइम्स) – नगदेश बौद्ध समूह व बौद्ध ल्याय्म्ह पुचःया मंकाः ग्वसालय् नगदेशय् नं धर्मचक्र प्रवर्तन दिवस हंगु दु । निगू बौद्ध संस्थाया मंकाः ग्वसालय् २६१५ क्वःगु धर्मचक्र प्रवर्तन दिवसया लसताय् नगदेश बुद्ध विहारय् उगु ज्याझ्वः जूगु खः ।
ज्याझ्वःकथं विहारया धम्महलय् सुथसिया ७ः३० ताः इलय् धम्महलय् नगदेश ज्ञानमाला भजन खलःपाखें ज्ञानमाला भजन न्ह्यब्वःगु खः । करिब निघौतक भजन न्ह्यब्वयेधुंकाः वयां लिपा नगदेश बौद्ध समूहपाखें तःजिक बुद्धपुजा याःगु खः ।
थाइल्याण्डं वर्षावास अधिष्ठानया निंतिं बिज्याःम्ह भिक्षु खनोङ्गपाखें अष्टशील व पंचशील ग्रहण याकाबिज्यासे उगु बुद्ध पुजा न्ह्याकूगु खः । ज्याझ्वलय् समूहया न्वकु उपासक कृष्णकुमार प्रजापतिं बौद्ध जगतय् असार पुन्हिया महत्वयात कयाः चर्चा यानादीगु खः ।
थ्व हे झ्वलय् असार पुन्हिया दिं लाकाः विहारया च्वय्या तँय् पूर्वी मोहदाया कःसिइ ६ फिटया फाइबरया पूर्वाभिमुख दना बिज्यानाच्वंम्ह बुद्ध मूर्ति, विहारया उत्तरपाखे च्वंगु कःसिइ ७ फिटया फाइबरया उत्तराभिमुखय् सिंह श्ययाय् ग्वतुलाबिज्याःम्ह बुद्ध मूर्तिया नं उलेज्या याःगु खः । थुपिं निगुलिं बुद्ध मूर्ति मूपाहांकथं बिज्याःम्ह अखिल नेपाल भिक्षु महासंघया नायःलिसें धर्मोदय सभाया केन्द्रीय नायः भिक्षु फ्राखु विशाल धम्मशोभन महास्थविरं अनावरण यानाबिज्याःगु खः । थुपिं निगू मूर्तिमध्ये दनाच्वंम्ह बुद्ध मूर्तिया दाता उपासक बाबुकाजी दुवाल व उपासिका लक्ष्मीभक्त घःजु खःसा द्यना बिज्याःम्ह बुद्ध मूर्तिया दाता नविन प्याथः खः ।
सिंह श्ययाय् ग्वतुलाबिज्याःम्ह बुद्धया मूर्ति दाता थः हे मूर्ति दयेकेगु व्यवसायय् लगे जुयादीगु २५ दँ क्यंगु रजत वर्ष क्यंगु लसताय् विहारयात सश्रद्धापूर्वक दान यानादीगु खः ।
शाक्यमुनि तथागत भगवान बुद्धं असार पुन्हि नं धाइगु गुरुपुन्हिया दिं गुरु आसनय् च्वनाबिज्यानाः वसपोल थम्हं प्राप्त यानाबिज्याःगु सम्बोधिज्ञान दकलय् न्हापां कपिलवस्तुया द्रोणग्राम निवासी पञ्चभद्र वर्गीय भिक्षुपिं भिक्षु कोण्डन्य, भिक्षु वप्प, भिक्षु भद्दिय, भिक्षु महानाम व भिक्षु अस्सजियात धर्मोपदेश बियाज्याःगु खः । वसपोल शाक्यमुनि तथागतं धर्मोपदेश यानाबिज्यासें न्हापांखुसी धर्मचक्र प्रवर्तन यानाबिज्याःगुलिं हे बौद्ध साहित्यया जगतय् गुरुपुन्हिया दिंयात ‘धर्मचक्र प्रवर्तन दिवस’ धकाः न्ह्यथनातःगु दु ।
LEAVE YOUR COMMENTS