त्रिकोणात्मक टि–२० श्रृंखला : नेपाःया न्हापांगु विजय
येँ (नेपालभाषा टाइम्स)- किपुया टियु मैदानय् नेपाः, नामिबिया व नेदरल्याण्ड्स दथुइ जुयाच्वंगु त्रिकोणात्मक सिरिजय् नेपालं न्हापांगु विजय चूलाकूगु दु । थ्वयां न्ह्यः निगू कासाय् पराजय फयेधुंकूगु नेपालं शुक्रवाः नामिबियायात स्वंगू रनं बुकूगु खः । कासाया अन्तिम ओभरय् नेपाःया करण केसीं याःगु उत्कृष्ट बलिङया ग्वाहालि नेपालं कासा त्याकेत ताःलाःगु खः ।
कासाया अन्तिम ओभरय् नामिबियायात कासा त्याकेत मुक्कं १२ रन जक माःगु खः, तर केसीया उत्कृष्ट बलिङया कारणं नामिबियां ७ रन जक दयेकेत ताःलात । कासाय् टस बुनाः न्हापां ब्याटिङ याःगु नेपालं निर्धारित २० ओभरय् च्यागू विकेटया क्षतिइ १८० रन दयेकूगु खःसा नामिबियां निर्धारित २० ओभरय् ७ विकेटया क्षति १७७ रन दयेकूगु खः ।
नेपाःया निंतिं कुशल मल्लं छगू चौका व प्यंगू छक्काया ग्वाहालिं दकलय् अप्वः अविजित ५५ रन दयेकूगु खः । अथेहे कुशल शाहं २३ रन, गुलशन झां २६ रन, आरिफ शेखं ३१ रन, दिपेन्द्र सिंह ऐरीं १६ रन, कप्तान रोहित पौडेलं १० रन, करण केसीं ७ रन, सोमपाल कामीं २ रन, आसिफ शेखं १ रन व प्रतिश जिसीं १ रन दयेकूगु खः । नामिबियाया सिकोन्गों स्वंगू व ज्याक ब्रसेलं निगू विकेट काःगु खः ।
नेपाःया निंतिं अन्तिम ओभरय् उत्कृष्ट बलिङ यासें कासा त्याकेत भूमिका म्हितूम्ह करण केसीं निगू विकेट काःगु खः । अथेहे कासाय् दिपेन्द्रसिंह ऐरीं निगू बलय् निगू विकेट कयाः नामिबियायात दबाबय् हःगु खः । अथेहे नेपाःया निंतिं सोमपाल कामी नं निगू विकेट काःगु खःसा अविनाश बोहरा नं छगू विकेट काःगु खः । नामिबियायात जेजे स्मिथं दकलय् अप्वः ५० रन दयेकूगु खः ।
LEAVE YOUR COMMENTS