इटलीलिसे बूसां वेल्स निगूगु चरणय्

येँ – युरो कपया समूह ए या अन्तिम कासाय् वेल्स इटलीपाखें १–० गोलं पराजित जूसां निगूगु चरणय् वनेत ताःलाःगु दु । आइतवाः बहनी जूगु समूह ए या हे मेगु कासाय् स्वीट्जरल्यान्डं टर्किंयात ३–१ गोलं बुकूगु खः, तर गोल अन्तरया ल्याखं वेल्स स्वीट्जरल्यान्ड स्वयां न्ह्यःने लानाः निगूगु चरणय् दुहां वनेत ताःलाःगु खः ।

समूह ए या अन्तिम कासा लिपा इटलीं स्वंगुलिं कासा त्याकाः ९ अंक सहित शीर्षस्थानय् दुसा स्वीट्जरल्यान्ड व वेल्सया ४–४ अंक दु, टर्कि फुक्क कासा पराजित जुइवं शून्यय् दु । स्वीट्जरल्याण्डया माइनस १ गोल जूगुलिं आः निगूगु चरणय् वनी कि मवनी धयागु मेपिनि कासाय् निर्भर जूवंगु दु ।

युरो कपय् प्यंगू समूहया स्वंगूगु थासय् लाःगु टिम नं निगूगु चरणय् दुहां वनी । मुक्कं खुगू समूह मध्ये स्वंगूगु थासय् लाःगु बांलाःगु प्यंगू टिम निगूगु चरणय् वनीगु नियम कथं स्वीट्जरल्यान्डया निगूगु चरणय् वनीगु सम्भावना धाःसा ल्यं दनि ।

इटलीया निंतिं कासाया ३९ औं मिनेटय् पेसिनां छगू जक गोल याःगु खः । थ्व विजय लिपा इटलीया अपराजित यात्रा २७ गू कासा थ्यंगु दु । इटलीं लिपांगु २७ गू कासाय् छगू नं पराजित जूगु मदुनिसा लिपांगु झिंछगू कासा झ्वलाक्क त्याका वयाच्वंगु दु ।

थ्व कासाय् वेल्सया अम्पाडुयात तप्यंक ह्याउँगु कार्ड नकूगु खः । थुगुसीया युरो कपय् थ्व सहित आःतक निगू ह्याउँगु कार्ड क्यनेधुंकूगु दुसा तप्यंक ह्याउँगु कार्ड नकूगु धाःसा थ्व हे न्हापांगु खः ।
मेखे टर्कि विरुद्धया कासाय् स्वीट्जरल्यान्डया निंतिं सफोरभिकं छगू व जार्डन साकिरीं निगू गोल याःगु खः । थ्व स्वंगुलिं गोलया निंतिं पास धाःसा स्टेभन जुबेरं मिले यानाबिउगु खः । टर्किया निंतिं काहाभेकीं छगू जक गोल याःगु खः ।

सम्बन्धित बुखँ

LEAVE YOUR COMMENTS