रुस्दी सुलाः सुलाः मजुइगु

इरानी सर्वोच्च धार्मिक नेता आयातोल्लाह रुहोल्लाह खोमेनीं मृत्यु दण्डया सजाय न्यंकेवं वंगु स्वदँ न्ह्यवनिसें अर्धभूमिगत जुयाच्वंम्ह नांजाःम्ह साहित्यकार सलमान रुस्दीं आः थः सुलाः सुलां मजुइगु खँ धाःगु दु । पेरिस भ्रमणय् वनाच्वंम्ह रुस्दीं एएफपीलिसे खँ ल्हासें धयादीगु दु, ‘आः जि सुला जुइ चाहे मजुया ।’

रुस्दीयात सन् १९८९ फेब्रुअरी १४ य् इरानी धार्मिक नेता खोमेनीं वय्कःया सफू ‘दी सटानिक भर्सेज’ इस्लाम विरोधी सफू जूगु धासें फतवाया आदेश बिउगु खः । तेहरानं दँय्दसं थ्व फतवायात कायम हे यानातःगु खः । रुस्दी विरुद्ध जारी यानातःगु फतवा लितकाःगु स्वदँ लिपा सन् २००१ य् रुस्दी थःगु सक्कली नामं पिहां वःगु खः ।

थ्वयां न्ह्यव वय्कलं नक्कली नां तया वयाच्वंगु खः । रुस्दीविरुद्ध फतवा जारी यायेधुंकाः वय्कःयात कडा सुरक्षा बिया वयाच्वंगु खः । पेरिसय् च्वंगु एएफपीया ज्याकुथिइ अन्तर्वार्ता बिउवःबलय् तकं ज्याकु न्ह्यःने प्रहरीं सुरक्षा बिया वयाच्वंगु खः ।रुस्दीं च्वःगु दी सटानिक भर्सेसया अनुवाद याःम्ह छम्हेसिया हत्या जुइधुंकूगु दुसा मेपिं निम्हेसित गोली व चक्कुं आक्रमण नं जुयधुंकूगु दु ।

निगू दशक धयाथें न्यूयोर्कय् च्वंगु इलय् धाःसा वय्कः सामान्य रुपं जीवन निर्वाह यानाच्वंगु खः । दी सटानिक भर्सेज रुस्दीया न्यागूगु सफू खः । थौंकन्हय् वय्कःया झिच्यागूगु सफू पिदनेधुंकूगु दु । छुं ई न्ह्यव जक भारतया मुम्बईया छम्ह मनूया बारे च्वयातःगु दी गोल्डेन हाउस पिदंगु खः ।