मालीइ नरसंहार, जातीय ल्वापुइ सछिम्हेसिया हत्या

अफ्रिकी देय् मालीइ डोगोल जातिया बसोबास दयाच्वंगु छगू गामय् जूगु आक्रमणय् थ्यंमथ्यं सछिम्ह मनूत सीगु खँ धागु दु । थ्व आक्रमण मालीया मोप्ती क्षेत्रया साङ सह लिक्कसंलाःगु सोबामे दा धाःगु थासय् जूगु खः । अधिकारीतय्सं आःतक ९५ म्हेसिया सीम्ह लुइकेधुंकूगु दुसा मेपिनि सीम्ह मालाच्वंगु दु ।

लूपिं सीम्ह मध्ये अप्वः धयाथें च्याकातःगु अवस्थाय् लूगु खः । मालीस्थित संयुक्त राष्ट्र संघीय शान्ति अभियानं थ्व घटना जूगु थासय् हाकनं अज्याःगु आक्रमण मजुइमा धकाः हवाइ ग्वाहालि छ्वयेधुंकूगु दु । राष्ट्र संघीय मानवाधिकार पर्यवेक्षकतय् छगू पुचलं थ्व नरसंहारया अनुसन्धान यायेत माली सरकारयात ग्वाहालि यानाच्वंगु दु ।

छुं ई न्ह्यवनिसें मालीइ थज्याःगु आक्रमणया घटनात जुया वयाच्वंगु दु । थज्याःगु छुं छुं आक्रमण निगू जाती दथुइ ब्वलंगु द्वन्द्वःया कारणं जूगु खनेदु । गुलिं आक्रमणय् जिहादी पुचः नं संलग्न खनेदु ।मालीइ शिकार याना जुइपिं डोगोन समुदाय व फुलानी समुदायया अर्धघुमन्ते गोठालातय् दथुइ इलय्ब्यलय् संघर्ष जुइगु याः ।

माली सरकारं आक्रमणकारीतय्सं उगु गामय् स्थानीय ई कथं सुथय् ३ बजे पाखे आक्रमण याःगु खः । सरकारं झिंगुम्ह मनूत अझं तनाच्वंगु खँ धाःगु दु । नरसंहारया समाचार वयेवं मालीया राष्ट्रपति इब्राहिम बुबकार काइटा स्वीट्जरल्यान्डया थःगु भ्रमण चिहाकः यानाः स्वदेश लिहांवंगु दु । वय्कलं प्रतिशोधया भावनां देय् न्ह्याः वनेफइमखु धासें सकलें मालीवासीयात एकताया आह्वान याःगु दु ।

थुगु घटनाय् म्वायेत ताःलाःम्ह अमादु टोगो नांया छम्ह मनुखं समाचार एजेन्सी एएफपीयात न्यय्म्हं मल्याक मनूत मोटरसाइकल, पिकअपं थीथी हतियार ज्वनाः आक्रमण याःवःगु खः । बिसिउँ वनेत स्वःपिंत नं लित्तुलिनाः स्याःगु खःसा मस्त, बुरा, मिसा छुं मधासे आक्रमण याःगु खः । थ्व आक्रमणयात कयाः आःतक छुं नं पुचलं जिम्मेवारी काःगु मदुनि ।

थ्व आक्रमणय् सोबामे दामाय् च्वनीपिं मनूत मध्ये स्वब्वय् छब्व मनूतय् ज्या वंगुखँ धाःगु दु । थन वंगु मार्च महिनाय् डोगोन जातिया वसः पुनातःपिं सशस्त्र आक्रमणकारीतय्सं सछि व स्वीम्ह फुलानीतय् हत्या यानाबिउगु खः ।

उबलय्या आक्रमण लिपा डोगोनतय् ‘डा ना अम्बास्सागा’े नांया संगठनयात सरकारं प्रतिबन्ध तयाबिउगु खःसा डोगोनतय्सं धाःसा थ्व समूह थःपिनि आत्मरक्षाया निंतिं जक जूगु व थःपिंके छुं कथंया हतियार नं मदुगु व उगु हत्याय् थ ःपिं संलग्न मदुगु दावी याना वयाच्वंगु दु ।

मालीइ च्वंगु संयुक्त राष्ट्र संघीय नियोगं वंगु मे ३१ तारिखय् पितबिउगु प्रतिवेदनय् मध्य मालीया अवस्था न्हियान्हिथं खराब जुया वनाच्वंगु खँ न्ह्यथनातःगु दु ।