रुसलिसें सम्मेलन यायेत अमेरिका तयार

एजेन्सी- अमेरिकाया राष्ट्रपति जो बाइडेन रुसी राष्ट्रपति भ्लादिमिर पुटिनलिसे युक्रेन तनावयात कयाः शिखर सम्मेलन यायेत तयार जूगु दु । ह्वाइट हाउसं बिउगु जानकारीकथं रुसं युक्रेनय् हमला मयात धाःसा अमेरिकां रुसलिसे युक्रेन तनावयात कयाः सम्मेलन याइगु जुइ । फ्रान्सया प्रस्तावय् अमेरिका रुसलिसे वार्ता यायेत तयार जूगु खः । बिबिसिं धाःकथं निम्ह नेता दथुइ सम्मेलन जुल धाःसा युरोपय् दशकौंलिपा खराब सुरक्षा संकटया समाधानया निंतिं कुटनीतिक लँ चाली ।

फ्रान्सया राष्ट्रपति इमानुयल म्याक्रो व रुसी राष्ट्रपति पुटिनया दथुइ स्वघौ तक जूगु फोन वार्ता लिपा फ्रान्सं थ्व प्रस्ताव तःगु खः ।

पुटिनलिसे वार्ता यायेधुंकाः म्याक्रों बाइडेनलिसे १५ मिनेट वार्ता याःगु खः । फ्रान्सया राष्ट्रपति कार्यालयया कथं सम्मेलनयात कयाः बिहिवाः अमेरिकाया विदेशमन्त्री एन्टोनी ब्लिङ्कन व रुसया विदेशमन्त्री सर्गेइ लावरोफ दथुइ बैठक जुइ ।

अमेरिका व युरोपया थीथी देसं रुसं युक्रेनय् हमला यायेत्यंगु धकाः न्हियान्हिथं द्वपं बिया वयाच्वंगु दुसा रुसं धाःसा थुकियात अस्वीकार याना वयाच्वंगु दु ।