चीन अमेरिका खनाः तंम्वल

एजेन्सी- अमेरिकां कोरोना भाइरसया उत्पति गन जूगु धयागु बारे हाकनं अनुसन्धान यायेगु निर्णय यायेवं चीन अमेरिका खनाः तंम्वःगु दु । अमेरिकी राष्ट्रपति जो बाइडेन निन्हु न्ह्यः अमेरिकी गुप्तचर विभागयात कोरोना भाइरस गनं वःगु पत्ता लगे यायेत आदेश बिउगु खः । बाइडेनं गुप्तचर विभागयात ९० न्हु दुने रिपोर्ट बीत धाःगु दु ।

कोरोना भाइरस दकलय् न्हापां सन् २०१९ या चीनया बुहान शहरय् खनेदुगु खः । चीनं थ्व भाइरस दकलय् न्हापां बुहानया छगू समुद्री नसाज्वलंया बजारय् खनेदुगु धाःगु खःसा वैज्ञानिकतय्सं नं जनवरया माध्यमं मनूतय्त थ्व भाइरस सरे जूगु धयाच्वंगु खः ।
तर अमेरिकाया पुलांम्ह राष्ट्रपति डोनाल्ड ट्रम्पं चीनया छगू प्रयोगशालापाखें हे थ्व भाइरस लिक जुया वःगु द्वपंबिया वयाच्वंगु खः । आः अमेरिकाया छुं संचार माध्यमतय्सं नं चीनया प्रयोगशालां हे भाइरस लिक जूगु प्रमाणत खनेदयावःगु धकाः धयाहयेवं राष्ट्रपति बाइडेनं थप अनुसन्धानया आदेश बिउगु खः ।

अमेरिकी पत्रिका वाल स्ट्रिट जर्नलं अमेरिकी गुप्तचर रिपोर्टकथं सन् २०१९ या नोवेम्भरय् हे बुहानया छगू प्रयोगशालाया स्वम्ह दुजःतय्त कोभिडया थेंज्याःगु लक्षण दुगु ल्वचं कयेवं अस्पताल वनेमाःगु समाचार प्रकाशन याःगु खः । तर चीनं धाःसा थज्याःगु समाचार फुक्कं गलत जूगु धकाः खण्डन यासें बरु अमेरिकी प्रयोगशालां हे थज्याःगु भाइरस वःगु जुइमाः धकाः धयाच्वंगु खः ।

अमेरिकी राष्ट्रपति बाइडेनं अमेरिकी गुप्तचर निकायत मध्ये छथ्वःसिनं थ्व भाइरस प्रयोगशालापाखें हे वःगु व निथ्वःसिनं जनावरं मनूयात सरे जूगु धयाच्वंगु दु धासें तर थ्व निथ्वसिनं नं यकीनकथं धायेफुगु मदुनिगुलिं थप अनुसन्धानया निंतिं आदेश बीमाःगु खँ धाःगु दु ।