ने. सं. ११४३ चौलाथ्व सप्तमी -

अमेरिकाय् डिसेम्बर ११ निसें खोप बीफइगु

एजेन्सी – अमेरिकी नागरिकतय्सं वइगु डिसेम्बरय् ११ तारिख तकया दुने कोरोनाया खोप कायेखनीगु खँ धाःगु दु । अमेरिकीया कोरोना भाइरसया खोप कार्यक्रमया प्रमुख डा. मोन्सेफ स्लावीं सिएनएनलिसे खँ ल्हासें थ्व खँ धयादीगु खः । वय्कलं खोपयात स्वीकृत जूगु २४ घन्टाया दुने खोपत थ्यंकेगु योजना दुगु खँ नं धयादीगु खः ।

अमेरिकी वासः कम्पनी फाइजर व वया सहायक कम्पनी बायोएनटेकं अमेरिकाय् थःपिंसं विकास यानागु खोपया निंतिं आकस्मिक अनुमति बीत वंगु शुक्रवाः आवेदन बिउगु खः । थ्व कम्पनीं विकास याःगु खोप ९० प्रतिशत स्वयां अप्वः प्रभावकारी दुगु खँ सार्वजनिक यायेधुंकूगु दु। थ्व खोप निक्वःतक बीमाःगु खँ धाःगु दु । थ्व खोप कायेधुंकल कि कोरोना भाइरसविरुद्ध ल्वायेगु निंतिं म्हं ल्वय्लिसे ल्वायेगु एन्टीबडी व टीसेल थःम्हं हे दयेकी । थुकिया निंतिं थ्व खोपय् कोरोना भाइरसया हे आनुवंशिक संरचना आरएनएया अंश छ्यःगु खः ।

फाइजरं थ्व दँया अन्त्य तक न्यागू करोड डोज खोप उत्पादन यायेफइगु आशा प्वंकाच्वंगु दु । अमेरिकाया खाद्य तथा औषधि प्रशासन (एफडीए)या खोप सम्बन्धी परामर्श समितिं खोपयात अनुमति बिइगु निंतिं डिसेम्बर १० तारिखय् सहलह ब्याकेगु क्वःछिनातःगु दु। डा. स्लावीं अनुमति बिउगु निन्हु दुकुन्हु हे खोप बीफइगु खँ धयादीगु दु । वय्कलं अमेरिकाया थीथी राज्यय् जनसंख्याया आधारय् खोप वितरण यायेगु खँ धयादीगु दु । अथेहे वय्कलं न्हापां खोप सुयात बीगु धयागु निर्णय सम्बन्धित राज्यं हे याइगु खँ नं धयादीगु दु । अथेखःसां स्वास्थ्य कार्यकर्ता व ज्याथजिथिपिंत निं प्राथमिकताय् तयाः न्हापां खोप बी ।

अमेरिकाया हे मेगु कम्पनी मोर्डनां नं थःपिंसं विकास यानागु खोपया परीक्षणया आधारय् ९५ प्रतिशत तक प्रभावकारी जूगु खँ धाःगु दु । थ्व खोपं नं वइगु छुं वाः दुने हे स्वीकृति कायेगु प्रक्रिया न्ह्याकेगु तयारी यानाच्वंगु दु । डा. स्लावीं खोपया प्रभावकारिताया आधारय् वइगु मे महिना तकया दुने खोपपाखें ७० प्रतिशत जनसंख्यायाके रोगप्रतिरोधात्मक क्षमता दइगु खँ धयादीगु दु ।