ट्रम्प दथुइ हे वार्ता त्वःताः पिहां वन
वाशिंगटन – अमेरिकी राष्ट्रपति डोनाल्ड ट्रम्प डेमोक्रेटिक पार्टीया सांसदलिसे जूगु छगू वार्ता दथुइ हे त्वःताः पिहां वंगु दु । राष्ट्रपति ट्रम्प बजेट अभावया कारणं वंगु झिंगुन्हु न्ह्यवंनिसें आंशिक रुपं बन्द जुयाच्वंगु सरकारी ज्याकू चायेकेगु विषयय् डेमोक्रेटिक नेतालिसें वार्ता यायेगु झ्वलय् दथुइ हे वार्ता त्वःताः पिहां वंगु खः ।
राष्ट्रपति ट्रम्पं डेमोक्रेटिक पार्टीया नेतालिसे जूगु उगु वार्तायात ‘ईयात सितिं छ्वयेगु ज्या’ जक जूगु संज्ञा बिसें वार्ता त्वःताः पिहां वंगु खः । बजेट अभावया कारणं सरकारी ज्याकू आंशिक रुपं बन्द जुइवं च्यागू लाख स्वयां अप्वः कर्मचारीं तलबतकं नये खनाच्वंगु मदु ।
राष्ट्रपति ट्रम्प व डेमोक्रेटिक पार्टीया नेतातय् दथुइ जूगु वार्ताय् ट्रम्पं अमेरिका व मेक्सिकोया सीमानाय् पःखाः ग्वयेत बजेट विनियोजन यायेत इनाप याःगु खःसा उकियात कयाः डेमोक्रेटिकया क्वय्या सदनया सभामुख न्यान्सी प्योलोसी व नेता चक शूमरं असहमति प्वंकेवं राष्ट्रपति ट्रम्पं वार्ता भंग जूगु धासें दथुइ हे त्वःता वंगु खः ।
वार्ता त्वःताः पिहां वयाखतं राष्ट्रपति ट्रम्पं डेमोक्रेटिक नेतातय्त सीमा सुरक्षाया निंतिं थःगु योजनाय् ग्वाहालि यायेत इनाप यानागु तर, इमिसं मजिउ धकाः लिसः बिउगु धासें ट्विट याःगु खः ।
राष्ट्रपति ट्रम्पं थःगु चुनावी अभियानया इलंनिसेंया प्रतिवद्धताय् निगू देय्या सीमा लागाय् पःखाः ग्वयेगु निंतिं व संघीय सरकारया ज्याकू संचालनया निंतिं क्वःछिनातःगु बजेटपखें आर्थिक व्यवस्था यायेमाःगु अडान कया वयाच्वंगु खः । उखे सरकारी ज्याकुथिइ ज्या ठप्प जुया वनाच्वंगु विषययात कयाः रिपब्लिकन व डेमोक्रेटिक पाटीं छम्हं मेम्हसित द्वपं बिया वयाच्वंगु दु ।
LEAVE YOUR COMMENTS