दिल्लीइ भीड जुइवं केजरीवाल आलोचित

येँ । भारतया राजधानी न्हूदिल्लीस्थित आनन्द विहारय् शनिवाः द्वलंद्वः मनूतय् भीड मुंगु खँयात कयाः अनया मुख्यमन्त्री अरविन्द केजरीवालया कडा आलोचना जूगु दु ।

बसपार्कय् छथुं द्वलंद्वः मनू मुंकाः कोरोना विरुद्ध भारतं यानाच्वंगु लडाईँयात असफल यायेत थज्याःगु ज्या याःगु धकाः समेत विपक्षी पार्टीतय्सं दिल्ली सरकारया आलोचना याना हःगु दु ।

शनिवाः व आइतवाः यानाः दिल्लीपाखें ४० हजार मनूतय्त बसय् तयाः पित छ्वःगु खः । शनिवाः आनन्द विहारं उत्तर प्रदेश व विहार वनेगु बस चले जुइगु दु धकाः सुथय् ४ बजे हे माइकिङ याः वःगु जुयाच्वन ।

मनूतय्त माइकिङ हे यानाः छेँनं पिहां वयेत प्रोत्साहित यायेगु ज्या न्ह्याम्हेस्यां याःसां थ्व अक्षम्य अपराध खः धासें सामाजिक सञ्जालय् नं मुख्यमन्त्री केजरीवालयात यक्वस्यां ब्वः बिया हःगु दु ।

आनन्द विहारय् छक्वलं उलिमछि मनू मुं वःगु खनेवं थारान्हूम्ह मुख्यमन्त्री केजरीवालं सुयातं पिहां वने मते, गन च्वनाच्वंगु खः अन हे च्वँ, नयेगु व च्वनेगु व्यवस्था याना बी धकाः आह्वान यानादीगु खः । तर विशेष यानाः श्रमिक ज्या याइपिं थ्व मनूत सामाजिक सञ्जालय् मदुगु जुयाः केजरीवालया आह्वान नं उमिसं सीके मफुत ।

न्हूदिल्लीया आनन्द विहारय् निसःनिसें स्वसःम्ह तक नेपाःमित नं थानाच्वंगु अनुमान दु । उपिं नं शनिवाः व आइतवाः बस गयाः उत्तर प्रदेश तक वःगु दयेमाः । उपिं अनं तुं सीमा नाका जुयाः नेपाः दुहां वइगु सम्भावना दु ।

ने.सं. ११४० चौलाथ्व ५ (चैत १६)

सम्बन्धित बुखँ

LEAVE YOUR COMMENTS