फ्रान्सय् १५ दँ क्वय्यापिं मस्तय्त सामाजिक संजालय् प्रतिबन्ध
पेरिस – फ्रान्सय् झिंन्यादँ क्वय्पिं मस्तय्त सामाजिक संजालय् प्रतिबन्ध तयेगु पक्षय् मतदान याःगु दु । फ्रान्सया राष्ट्रपति इम्यानुएल म्याक्रों सामाजिक संजाल एक्सपाखें थुकिया जानकारी बिउगु खः ।
राष्ट्रपति म्याक्रों सांसदतय्त इमिगु समर्थनया निंतिं सुभाय् देछासे थुगु विषयय् थः प्रतिबद्ध दुगु धाःगु दु । म्याक्रों याकनं हे थ्व निर्णय कार्यान्वयन यानाः १५ झिंन्यादँ क्वय्यापिं मस्तय् निंतिं सामाजिक संजालय् प्रतिबन्ध तयेगु खँ न्ह्यथंगु दु । म्याक्रों थ्व संवैधानिक परिषद्या निर्णयय् निर्भर जुयाः थः मस्तय्त अनलाइनया असुरक्षापाखें बचे यायेत सकसितं इनाप नं याःगु दु ।
अमेरिकी समाचार संस्था सीएनएनयाकथं थ्व निर्णयलिसें फ्रान्स सामाजिक संजालय् उमेरयात कयाः प्रतिबन्ध तःगु युरोपेली युनियनया न्हापांगु देय् जुइगु जूगु दु । थ्व स्वयां न्ह्यः वंगु जुन महिनाय् बेलायतं १६ दँ क्वय्या मस्तय्त निंतिं सामाजिक संजालय् प्रतिबन्ध तयेगु घोषणा याःगु खः ।
बेलायतया पुलांम्ह प्रधानमन्त्री किर स्टार्मरं छगू भिडियो सन्देशय् थुकियात ईया आवश्यकता व देय्या निंतिं तःधंगु निर्णय धकाः संबोधन याःगु खः । उगु भिडियो सन्देशय् स्टार्मरं गुकथं सामाजिक संजालं मस्तय्त कासा, न्ह्यः व छेँजःलिसे ई फ्यायेगुपाखें तापाक तयाः इमिगु मानसिक स्वास्थ्य् हानी यानाच्वंगु दु धइगु बारे नं कनातःगु दु ।
जून महिनाया शुरुइ जापानं म्हो उमेरया मस्तय् निंतिं सामाजिक संजाल छ्यलीपिनिगु निंतिं प्रस्तावित उपायया धलखय् कडा उमेर प्रमाणिकरण व छुं सुविधात प्रतिबन्धित यानाः सामाजिक संजालया अपरेटरतय्गु जिम्मेवारी बल्लाकेत आह्वान याःगु क्याडो न्युजं रिपोर्ट याःगु दु ।
अस्ट्रेलियां थगुने १६ दँ क्वय्या मस्तय्त सामाजिक संजाल संचालनय् पूर्णरुपं प्रतिबन्धत तःगु खःसा स्पेन व डेनमार्क लगायतया देय्तय्सं नं थुकथंया निर्णययात कयाः विचाः यानाच्वंगु धाःगु दु ।
LEAVE YOUR COMMENTS