ने. सं. ११४६ दिल्लाथ्व दशमी -

ख्वपय् वंगु दँय् दुहां वःपिं पर्यटक म्हो

ख्वप (नेपालभाषा टाइम्स) – सांस्कृतिक व पर्यटकीय नगरी ख्वपय् वंगु आर्थिक दँय् निगू लख स्वयां अप्वः विदेशी पर्यटक दुहां वःगु दु । ख्वप नगरपालिकाया पर्यटन सूचना व सेवा केन्द्रया कथं वंगु आर्थिक दँ २०८२/०८३ लय् मुक्कं २,२१,९७६म्ह पर्यटक दुहां वःगु दु ।

केन्द्रया तथ्यांककथं थ्व स्वयां न्ह्यः वंगु आर्थिक दँ ०८१/८२ लय् २,४४,८९२म्ह पर्यटक ख्वप देसय् दुहां वःगु खः । थ्व ल्याखं थगुने स्वयां वंगु आर्थिक दँय् ख्वपय् दुहां वःपिं विदेशी पर्यटकया ल्याः २२,८९२ म्ह (९.३५ प्रतिशत)या ल्याखं म्हो जूगु केन्द्रया तथ्यांक दु ।

वंगु आर्थिक दँय् सार्क राष्ट्रलिसें मेमेगु देशं वःपिं पर्यटकया ल्याः नं म्हो खने दु । वंगु आर्थिक दँय् ख्वप देसय् सार्क राष्ट्र बाहेकया विदेशी पर्यटक १,११,४४५ म्ह दुहां वःगु दुसा थ्व वंगु आर्थिक दँय् स्वयां १७,९३६ म्ह (१३.८६ प्रतिशतं म्हो खः । अथे हे वंगु आर्थिक दँय् ख्वप देय् चाःहिउ वःपिं सार्क राष्ट्र व उत्तरी जःलाखःला देय् चीनिया पर्यटकया ल्याः १,१०,५३१ म्ह दु । थ्व धइगु वंगु थगुनेया आर्थिक दँ स्वयां ४.२९ प्रतिशतं म्हो खः । थुकथं सार्क राष्ट्र व मेमेगु देशं वइपिं पर्यटकया ल्याखय् म्होति वयेवं पर्यटकपाखें जुइगु आम्दानीइ नं म्हो जूगु केन्द्रं न्ह्यथंगु दृु ।

केन्द्रयाकथं वंगु आर्थिक दँ २०८२/०८३ लय् ख्वप देय् दुहां वःपिं पर्यटकपाखें प्रवेश शुल्क वापत २७ गू करोड ५० गू लख ख्वीस्वद्वः व न्यासः तका आम्दानी जूगु खः । अथे हे अमेरिकी डलर २३,१९०९ आम्दानी जूगु खः । थ्व स्वयां न्ह्यःया आर्थिक दँ ०८१/८२ लय् ख्वपय् दुहां वःपिं पर्यटकपाखें २९ गू करोड ११ गू लख स्वयां अप्वः दुगु केन्द्रं जानकारी बिउगु दु । थगुने स्वयां थुगु आर्थिक दँय् नेपाली मुद्रालिसें अमेरिकी डलरया आम्दानीइ नं म्हो वःगु दु ।

ख्वप देय् चाःहिउ वइपिं विदेशी पर्यटकया ल्याखय् म्होति वःगुयालिसें पर्यटन आम्दानीइ नं प्रत्यक्ष प्रभाव लाःगु केन्द्रं न्ह्यथंगु दु । पर्यटकया ल्याः म्हो जूगु परिस्थितियात ध्यानय् तयाः ख्वप नगरपालिकां आन्तरिक पर्यटन प्रवद्र्धनयात विशेष प्राथमिकता बियाहःगु दु । थुकिया निंतिं नगरपालिकां थीथी उत्सव, महोत्स, पदयात्रा, सांस्कृतिक ज्याझ्वः यायेगु नापं आन्तरिक पर्यटन प्रवद्र्धनया गतिविधित न्ह्याका हयाच्वंगु दु ।

ख्वप नगरपालिकां थौंकन्हय् थनया खौमा, चिधंगु ब्यासी, तःधंगु ब्यासी, महाकाली, बेखाल, मूध्वाखा, कमलविनायक, च्याम्हासिंह, जगाति, भ्यलुख्यः राममन्दिर, बाराही, वंशगोपाल व भार्वाचो यानाः झिंप्यंगू थासय् पर्यटक प्रवेश शुल्क काउन्टरपाखें ख्वपय् दुहां वःपिं विदेशी पर्यटकपाखें शुल्क संकलन याना वयाच्वंगु दु ।

ख्वप नगरपालिकां आर्थिक दँ २०८२/०८३ निसें अमेरिकी डलरया विनिमय दर वःगु हिउपाःयात ध्यानय् तयाः ख्वपय् दुहां वइपिं गैर सार्क राष्ट्रया छम्ह पर्यटकयाके निद्वः तका, सार्क राष्ट्र व चीनिया पर्यटकयाके न्यासः प्रवेश शुल्क कायेगु याना वयाच्वंगु दु ।