मुम्बईया धारावीइ कोरोना खनेदयेवं उच्च सतर्कता

येँ – एशियाया दकलय् तःधंगु भिखाछेँ (झोपडपट्टी)य् कोरोना भाइरसया संक्रमण खनेदयेवं उच्च सतर्कता कायेगु सुरु याःगु दु ।

मुम्बईया धारावीइ स्वम्ह मनूतय्त थ्व संक्रमण खनेदुगु खः । उकी मध्ये छम्ह ५६दँयम मनू बुधवाः सीगु खः । अथेहे ३५दँया छम्ह चिकित्सक व ५२दँया नगरपालिकाया कर्मचारीयात नं संक्रमण जूगु पुष्टि जूगु दु । ब्रिहानमुम्बई नगरपालिकाया अधिकारीतय्सं अन सीम्ह मनू गनं पिहांमवंगु धासें बिरामी जुइवं आइतवाः स्थानीय अस्पतालय् भर्ना याःगु खः । सीम्ह मनूया न्हय्म्ह छेँजःयात छेँ हे क्वारेन्टिनय् तःगु दुसा इमिगु न्ययेत्वनेगु व्यवस्था नगरपालिकां हे याइगु जूगु दु ।

स्वास्थ्य विज्ञतय्सं धारावी थज्याःगु तःधंगु भिखाछेँ भाइरसया संक्रमण न्यनावंसा उकीयात पनेत तसकं थाकुइगु ख्याच्वः बिउगु दु । थुकीयात ध्यानय् तयाः अनया नगरपालिका, राज्य व संघीय सरकारं थुगु विषययात उच्च प्राथमिकताय् तःगु दु ।

५ वर्ग किलोमिटर जक दुगु धारावीइ न्हय्गू निसें झिगू लखतक मनूत च्वनाच्वंगु अनुमान दु । छगू हे कोथाय् च्याम्ह निसें झिम्ह मनूत च्वनेगु यानाच्वंगु दुसा छगू वर्ग किलोमिटरय् निगू लख स्वयां अप्व मनूत च्वनीगु थासय् सामाजिक दुरुया सम्भवाना नं मदु ।